【Viu】組合艾粒連續四場喺九展為佢哋出道20周年舉行紀念騷，無論係笑聲、尖叫聲全晚都冇停過！成個騷以半talk半唱形式進行，當奴先自嘲老套唔入流，因為疫情至今都冇「中招」，但話見張繼聰臨開騷確診即刻好大壓力；相反少爺占自爆9月中做完「肉酸檢測」知瀨嘢，好彩好快好番兼靠秘方解決冇味覺後遺症。
去到個騷尾段，二子嚟個才藝比賽，少爺占先出場自彈自唱Edan首《E先生連環不幸事件》；當奴後跳唱Anson Lo嘅《Megahit》，笑話每日起碼聽歌10次，就連發夢都跳緊，不過唔知當奴係咪跳得太high，唱完即刻失聲！之後佢哋嚟個豪華騷肌放題，少爺占讚當奴超有恆心操足幾個月，繼而宣布明年二月開Part 2好消息！
對於被爆秘密離婚5年嘅當奴，自言冇被影響心情，反而係更擔心攞唔到核酸結果開騷，又指同前妻Jan張詠恩再見亦是家人，前晚總綵排已經嚟咗撐場。當奴話要睇下世緣份再決定復合，相信下世會重遇？佢表示：「承你貴言。」
