【Viu】由馮志強執導嘅ViuTV人氣劇《I SWIM》自播出後話題十足，除咗有男神嘅肌肉放題外，首次擔正做男一嘅Jeffrey魏浚笙亦大獲好評，大家都讚佢演技自然唔造作，連馮導都話有驚喜！至於飾演王者泳將黃亞樂嘅Stanley喺劇入面泳術出眾，喺眾多位仔仔當中馮導話Stanley係演黃亞樂嘅不二之選；而演開搞笑角色嘅Edan，今次挑戰做嚴肅認真嘅泳隊隊長李馬榮，馮導就好欣賞佢有呢份勇氣喇。《I SWIM》係根據馮導嘅原創同名小說改編，故事背景正正係佢嘅中學回憶，睇返佢後生個樣又真係好Fit好charm，連Jeffrey都讚佢係個靚仔導演，不過馮導好謙咁否認，仲話《I SWIM》劇情有真有假添。
