【Viu】ViuTV「一哥」強尼、「一姐」Hailey陳俞希聯同Alice主持嘅最新真人騷《戀愛Staycation》將於下星期一晚首播，三位今日齊齊為節目造勢，言談間流露出想自肥嘅渴望，Hailey同Alice互相篤爆對方想參加，而強尼就預告呢個節目嘅花生程度爆燈，身為局外人都戥啲參加者肉緊！
睇得咁投入，會唔會對某一個參加者有好感先？強尼醒目先行退下，Alice笑話：「如果同我相處就有。」至於Hailey就對某男參加者喊話：「完咗節目你嚟搵我啦！」嘩～邊位咁lucky得到一姐寵幸？咁如果開第二季係藝人賽又點睇？佢哋都即刻話想玩，自認零偶包嘅Hailey仲話想帶埋好姊妹周秀娜參加，益自己友嘛！唔知娜姐又有冇興趣呢？
