【Viu】藝人黎美言（Winkie）今日出席「香港著名品牌頒獎禮2021」，旗下嘅拳擊舞蹈學校同娛樂公司均獲獎項，兩者更分別係連續5年同2年奪得殊榮，認真犀利！難怪Winkie勁hyper咁話有意擴大生意版圖，希望未來唔使再同partner夾資場地，成盤生意真正由自己打骰，再喺九龍、港島區開設分店。
瞓身搞fitness生意同時，Winkie內心仍然難捨娛樂圈、舞台，所以開設咗間娛樂公司，自簽5位歌手，主行二次元路線，會唔會順便自肥自資出埋歌先？Winkie嘅答案係會嘅！唔止出歌咁簡單，仲會出碟添！既然有咁多好消息就唔好再畀佢停，Winkie終極預告喺未來幾年會同男友拉埋天窗兼生B，等你公布喜訊啦！
