今個月30號係MIRROR成員姜濤嘅23歲生日，每年接近偶像生日，「姜糖」都會落重本舉行一連串慶祝活動，上年最觸目嘅，就係花6位數字買電車廣告打造「姜濤號」。沒有最誇，只有更誇，今年「姜糖」竟然包起4月30號全線電車，畀市民免費乘坐，成為香港首個民間舉辦嘅電車免費乘車日！
早前姜濤喺社交平台呼籲粉絲，將生日應援集資幫助有需要嘅人，「我想說，你們的心意我全部都收到了，但今年我希望你們把應援集資用來幫助身邊更多有需要的人。特別是現在疫情時期，社會上每一個人都過得不容易。所以，我們更應該傳遞我們的愛心和力量。」
Photo／IG@keung_show
「姜糖」隨即響應偶像呼籲集資做公益，其中一樣就係電車活動。香港電車今日於官方Facebook宣布，得到姜濤香港後援會KeungShow HKFanClub贊助，喺4月30日舉行「姜濤生日免費乘車日」，而呢次更係香港史上首個，由民間團體自發舉辦嘅免費乘車日。
Photo／FB@Hong Kong Tramways 香港電車
除此之外，後援會將於4月22日至5月22日，喺尖沙咀The ONE、銅鑼灣皇室堡商場設期間限定店，義賣咕臣、手機殼、杯、眼罩等精品，所得收入扣除成本後會全數捐畀唔同慈善機構，為姜濤生日加添多份意義。
Photo／FB@姜濤香港後援會KeungShow HKFanClub
Photo／FB@姜濤香港後援會KeungShow HKFanClub
Photo／FB@姜濤香港後援會KeungShow HKFanClub、@Hong Kong Tramways 香港電車、IG@keung_show
