【Viu】有Gay界男神之稱嘅林耀聲，舊年同麥子樂、黃又南一齊拍戚其義監製嘅網劇《逐流時代》，飾演海味舖三兄弟！當中阿聲飾演一位有音樂夢嘅Band仔，而現實中阿聲都夾過Band，同岑珈其、黃溢濠、梁曉豐組男團PlayTime，當初仲係以日本天團Arashi嵐為原型，雖然而家組合解散咗，不過大家私下依然非常老友！好似之前阿聲拍電影《造口人》，要應付九十幾場全英文戲份，都係多得梁曉豐同經理人麥曦茵幫佢苦練，當時真係壓力大到佢喊咗出嚟添啊！唔知係咪因為佢拍得同志片多，又成日唔著衫派福利，好多同性都對佢心心眼，而且佢都話拍戲時，無論對手係男係女，當下都要愛上對方，先會真正投入角色，果然係專業演員啊！
