近日疫情嚴峻，政府出招禁堂食，公務員亦帶頭周四起分組在家工作。無得出街食晚餐，又慳返唔少交通時間，梗係趁機會煲下劇娛樂自己，今個月就有3套焦點日劇開播，仲要全部都可以喺黃Viu免費任睇！
《勿說是推理》（1月10日首播）
呢套由視帝菅田將暉主演嘅劇集，未開播已經相當令人期待，更係佢同小松菜奈閃婚後嘅重磅回歸之作！刑偵喜劇《勿說是推理》改篇自人氣同名漫畫，講述因為天生攣毛而感到自卑、無朋友亦無女友，人生只愛咖哩嘅高智商大學生久能整（菅田將暉飾），某日因為大學同學身亡而被警察認為係謀殺案嫌疑犯！佢唯有發揮智慧幫自己辯白，並且搵出真相。
《Doctor White》（1月17日首播）
醫療劇大家就睇得多，不過今次劇集主角雪村白夜（濱邊美波飾）竟突然失去記憶同生活常識，唯獨有豐富嘅醫療知識同天才一樣嘅診斷能力，去糾正誤診、救助病人，就算係資深醫生都自嘆不如！劇集改編自《金田一少年事件簿》作者樹林伸兩部作品《Doctor White 千里眼的診療簿》同《Doctor White 神之診斷》。
有「日版王祖賢」之稱嘅濱邊美波首次擔正黃金檔，同時都係第一次拍醫療題材，佢都坦言相當興奮！
《隔壁的Chikara》（1月20日首播）
溫情日劇《隔壁的Chikara》由松本潤同上戶彩搭檔演夫妻，雖然佢哋相識超過廿年，但呢套劇竟然係佢哋首次合作！
劇集以東京某公寓為舞臺，講述影子寫手、小說家中越和良（松本潤飾）同妻子中越燈（上戶彩飾）育有一子一女，過住平淡幸福生活。雖然和良為人隨性、做嘢半桶水，但對於身邊嘅人總係推心置腹，亦帶住「想拯救人心」嘅想法熱情為鄰居們解決問題，不知不覺間中越家將公寓住戶匯聚成一體，還形成咗強烈嘅羈絆⋯⋯
聽到演員陣容同劇情，已經急不及待想盡情煲劇？上述劇集將會陸續開播，而且同日就會上架「黃Viu」煲劇平台，畀各位觀眾免費任睇！
