【A&M Diary】我同M佬都好鍾意迪士尼，雖然我哋無話特別鍾意邊個迪士尼動畫人物，但我哋每次去到迪士尼總覺得好似有種魔法會讓我哋投入呢個童話世界。所以今年嘅生日，M佬就帶我嚟到迪士尼探索家度假酒店玩Staycation慶祝。酒店除咗有泳池、兒童遊戲室之外，仲會因應唔同嘅season，提供唔同嘅活動同興趣班，所以入住迪士尼探索家度假酒店真係完全唔會悶架！加上酒店設計充滿異國風情，超有度假Feel！
泊車收費
相信有唔少曾經住過迪士尼各間酒店嘅朋友都知道，以前呢度係免費泊車架！依家嘅住客泊車收費係$190，可以由check-in泊到第二日嘅23:59，收費期內可以隨意喺迪士尼酒店、迪士尼探索家度假酒店、迪士尼樂園停車場泊車，但要留意迪欣湖停車場係不包括在內嘅。如果係選擇公共交通工具嘅朋友就可以乘坐迪士尼樂園度假區嘅穿梭巴士往返酒店同港鐵迪士尼站。
酒店大堂
迪士尼探索家度假酒店喺2017年開幕，酒店仍然非常新淨，保養得非常好。我哋好鍾意迪士尼嘅原因就係因為佢每個景點、遊樂設施都會有一個好貫徹嘅故事，所以一踏入酒店大堂已經深深感受到「探索家」呢個主題。除咗職員嘅制服，酒店仲有唔少細緻位都令你充滿驚喜，例如電梯會模擬成熱氣球、Lobby有探險家行李箱、工藝品同珍藏，勁多打卡位㗎！但為咗唔想打破你哋入住時嘅驚喜，你哋到時可以慢慢發掘啦！當然作為迪士尼嘅酒店，就唔少得有迪士尼朋友出現同你影相打卡啦！
迪士尼探索家度假酒店總共提供750間客房，房間分佈喺4個區域，並以各大洲命名：亞洲、非洲、南美洲同大洋洲。我哋今次入住嘅房間係大洋洲，其實各大洲房間嘅分別唔大，主要係走廊、同門牌設計會有所不同。另外，迪士尼探索家度假酒店嘅check-in大堂位於3樓，整間酒店面積非常大，所以check-in嘅時候，職員都會好細心講解路線同各項活動嘅安排。
房間區域
我哋今次入住嘅房間位於大洋洲2樓，窗外景色以小海龜庭園為主，雖然樓層較矮，但都睇到海景，整體景色都算開揚。至於迪士尼各間酒店都以家庭客為主，所以空間感十足，而睡床則為兩張Queen Size大床，一張床嘅上面掛上米奇頭，另一張床嘅上面就掛上米妮頭，米奇同米尼都貫徹探險嘅感覺。至於床單柔軟，配上2個較軟同2個較挺嘅枕頭，但略嫌百葉簾嘅遮光度麻麻，第二朝就被陽光騷擾喇。
另外，房間嘅衣櫃採無門設計，分別放有大人同小朋友嘅浴袍同拖鞋。房間內亦有電熱水煲、2大支支裝水、免費嘅茶包同咖啡包，如果需要mini bar其他飲品，呢度亦有package，夠晒抵！另外，由於房間以家庭客為重心，所以水杯都有4隻，仲要超得意架！
房間嘅靠窗位置有一個小偏廳，啱晒大家影相打卡！但最令我哋滿意嘅係呢部電視呀！電視節目除咗一般香港或海外衛星頻道，仲有2個迪士尼頻道，全天候播放迪士尼動畫，最正係用廣東話配音架（當然亦可選擇英語或國語配音）！另外，房內嘅燈、窗簾、電話、記事簿都配合探險家主題設計。房間唔同位置都有插頭位置，床邊同書枱邊更設有USB插頭。而且每個電掣都由保護套蓋上，完全唔洗擔心小孩會唔小心觸電。
浴室區域
浴室採半開放式，令大家可以同時使用洗手間嘅唔同位置。淋浴區內放有洗頭水、沐浴露同護髮素，品牌採用品牌為H2O+。至於其他個人用品用一個實用嘅米奇鐵盒裝住，絕對係入住酒店嘅一大紀念品！鐵盒內有番梘、牙膏、牙刷，小朋友專用嘅米奇、米妮牙刷、浴帽、剃鬚刀等等。另外，淋浴區內雖然已放有洗頭水、沐浴露同護髮素，但呢度亦有提供可帶走，米奇頭嘅洗頭水、沐浴露同護髮素，真係好靚呀！
娛樂設施
迪士尼探索家度假酒店嘅住客可同時使用其他酒店嘅設施同活動（泳池除外）。如果想做gym或者打網球，就可以拎埋房卡，坐接駁巴士去香港迪士尼樂園喇！至於迪士尼探索家度假酒店嘅泳池叫雨澄泳池，雖然就未有滑水梯等設施，但泳池深度1.2米，非常適合小朋友。
除咗泳池之外，因應4個唔同區域：亞洲、非洲、南美洲同大洋洲，亦分別設有四個地區為主題嘅庭園。
小哈頓庭園：位於亞洲區域，以《森林王子》中嘅大象「哈蒂上校」為主角，庭園以亞洲自然風光同種植四季唔同嘅花叢為主。
彩鳥古雲庭園：位於南美洲區域，以《沖天救兵》中嘅彩鳥「古雲」為主角，種植多種南美洲植物。
拉飛奇庭園：位於非洲區域，以《獅子王》中嘅狒狒「拉飛奇」為主角，營造置身於狩獵嘅營地同大草原當中。
小海龜庭園：位於大洋洲區域，以《海底奇兵》中嘅海龜「阿古」為主角，播放着海浪聲同放有唔同嘅水上活動佈景，加上草坪形做成波浪。
海底奇兵小天地
作為以家庭為主打嘅酒店，迪士尼探索家度假酒店內嘅海底奇兵小天地，就有好多適合小朋友玩嘅設施，入去之前必須除鞋、著襪同消毒雙手。入面有滑梯、繩網陣、電影放映會及幼兒玩具等設施。另外，仲有不定時舉行嘅手工班同尋找隱藏米奇嘅定向活動，而我哋今期適逢迪士尼萬聖節，手工班就係製作呀Jack喇！
***香港迪士尼酒店同樣設有適合小朋友玩嘅童話天地，有時間可以順便去埋，同樣會舉行嘅手工班同尋找隱藏米奇嘅定向活動。
**樂園亦有提供收費活動，如果有興趣可以去報名呀！
