方皓玟（小明）首個紅館騷《方皓玟LOST n FOUND》噚晚（29/8）圓滿結束，演唱會一連四晚都有RubberBand、林家謙，以及師妹章尾而（Jamie）做固定嘉賓，而最後兩場小明更加破例加碼Encore。除咗表演陣容強勁，仲有唔少圈中朋友撐場，尾場就有黃耀明、王宗堯、傅珮嘉、DJ梁文禮及茜利妹等。
今次演唱會原定去年舉行，不過因疫情關行延至今年8月開騷，期間小明一直為演唱會操練，勤力健身練舞。喺紅館台上，小明著上多套性感有型嘅戰衣，唱出《Freedom》、《TMD》、《To Haters》等快歌，展現fit爆操練成果。其中一段，小明帶領12位半裸猛男大跳櫈仔舞，睇到全場熱血沸騰。雖然唔少歌都要邊跳邊唱，但小明唱live依然非常穩定，滿足晒觀眾嘅視覺、聽覺享受！
表演接近尾聲，小明唱出《你是你本身的傳奇》、《假使世界原來不像你預期》兩首大熱歌，全場開著手機燈揮動，一齊大合唱。之後小明喺點滿燭光嘅舞台獻唱新歌《你好嗎》及《願》，令不少觀眾感動。過往小明甚少Encore，不過最尾兩場完場時大部分人都唔肯離場，狂嗌Encore，熱烈嘅反應令小明感動到上返台，加碼唱多幾首歌滿足歌迷。
Photo／IG@rubberband、@charmainefong
