【港姐準決賽】關禮傑陪愛女關楓馨表演彈琴　網民批唔公平

無綫《2021香港小姐競選》昨晚（22日）舉行準決賽，12位佳麗獲選晉身決賽，當中包括關禮傑大女關楓馨。入決賽本來係開心事，不過關楓馨就因為有爸爸傍住上台表演，被網民質疑有特權。

關禮傑大女關楓馨（Photo／IG@tiffanyfabi）

昨晚12位佳麗分成4組進行才藝表演，關楓馨所屬嘅紅組做小型音樂劇，期間關禮傑現身助陣，陪關楓馨一齊彈鋼琴，之後就功成身退落台，由阿女同隊友繼續表演。

Photo／TVB節目截圖

有網民就批評大會不公，容許本身係星二代嘅關楓馨帶爸爸上台拉票，「擺明唔公平啦，擺埋老豆上臺站枱（台），點解得佢一個人有呀，其他人點呀」，「大會造馬做到出晒面，故意安排關兩父女上台搶分，已經練到滾瓜爛熟去搶分，這對任何佳麗都不公平，何來公信力，選美界醜行。」但都有觀眾認為關楓馨靚女、表現亦唔錯，唔應該因此抹殺佢嘅努力。