台灣藝人陳建州 (黑人) 噚日喺IG更新限時動態，上傳一張電視畫面嘅相片，為中華台北柔道選手加油，結果被眼利網民發現，畫面上方有疑似安博盒子機頂盒訊息，被指非法睇奧運賽事。佢最初都唔認用非法機頂盒，但網民展開全方位偵查，黑人最終不認不認還須認。
Photo / Facebook@黑人 陳建州
范瑋琪IG及Facebook截圖
有網民到黑人Facebook留言質問，點解電視畫面上方出現「微信：ubtv1818 帳號已更新 請勿添加」嘅訊息，佢最初辯稱「這是朋友群組的截圖，後來發現也傻眼。」不過，紙始終包唔住火，網民再到佢老婆范瑋琪Facebook搵蛛絲馬跡，原來呢個機頂盒一早喺多條影片同相已經亮相。
黑人 陳建州Facebook截圖
大話冚大話唔係辦法，本身係台灣職業籃球聯盟PLG執行長嘅陳建州，今日終於承認用安博盒子睇奧運，「對於錯誤使用奧運非授權畫面，本人深感抱歉，身為公眾人物必須接受更高的社會責任檢視，為這次個人行為負責，也會記取教訓未來會更加注意自己個人的行為，繼續用行動為體育發展付出，回饋社會。」
Photo / Facebook@黑人 陳建州
范瑋琪IG截圖
喺人人浸淫social media嘅年代，乜都分享一番往往出事，不過事件爆發至此，范范似乎仲未從寶貴一課中成長，反而喺IG貼出一句「The difference between pasta and your opinion is I asked for pasta.」大概意思係「你理得我唧！」有批評其他人多管閒事之意，唔少網民再留言砲轟「做錯事承認不可恥，可恥的是不敢承認，別變成演藝圈的賴皮豬」、「說謊成性」。
朱立倫Facebook截圖
安博盒子喺台灣似乎幾好賣，網民亦發現國民黨前主席朱立倫上星期二 (27日)，喺Facebook share咗張相，見到佢睇緊柔道選手楊勇緯比賽畫面，電視機下面擺放神秘「白色盒子」，疑似同陳建州同樣用安博盒子嘅非法訊號來源睇奧運。被網民揭發後，張相已經加工處理，將白色盒子打格仔。
