【Now.com娛樂】社會分裂已經去到水火不容，即係你買支汽水買個叉燒飯，都想幫襯個老闆跟你理念相同的，唔係咁樣會多條臘腸，而係要同一立場。漸漸就引伸出近月討論熾熱的黃色經濟圈，最明顯的是食肆，大家都選擇黃店去排隊幫襯，排兩個鐘冇問題，難食少少都無問題，是要食那份同聲同氣。
食肆進行得如火如荼，以現時的支持者與大家的決心，暫時推行得相當順利，就連杜汶澤的網台都說要幫大家免費宣傳，去踩場試食有嗰句講嗰句。這個黃色經濟圈，一人一小步，連成大規模。
同一道理，放落其他行業又得唔得呢？上星期歌手方皓玟有新歌派上YouTube，歌名叫〈人話〉，一聽就似「有啲嘢」，看看歌詞︰「聽你講嘢聽到忟 用你的特殊技能扮中肯 錯就錯在已被禁 欠公允倒退的厄運」，都未算應棍，最應是有粗口助攻︰「tell me what X you say 還擺出高姿態你講Ｘ夠未 最重要是過程缺乏証明 靠左耳穿過右耳尖叫哭聲」
有無留意，其實歌詞沒有指名道姓鬧邊個，你話鬧前度、鬧賤男、鬧老公都得，只要對方係令到「聽你講嘢聽到忟」就自然可對號入座，不過首歌MV就明顯得多，因為夾雜了很多警察4點鐘記者會的畫面，還有示威者被警方濫暴的場面，對口非常明確。
其實這些畫面大家都看到，大家都有感受，只是大家不敢唱不敢拿來作為創作題材，唱了就沒機會返大陸搵錢，甚至有不少抵制。不過當這個音樂圈都可以黃起來的話，又是否需要害怕？當日何韻詩在市面未摸索到路向時，都敢於行出第一步，成功舉行一場眾籌演唱會。今天環境已經成熟多了，靠志同道合的樂迷支持養活自己，又是否想得這麼渺茫？如果成功，電影圈、電視圈、廣告圈等等，可以無限伸延，影響力將會難以想像。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
