【Now.com娛樂】作為一個焦慮同驚恐底嘅人，雖然都接近康復，但睇到高以翔突然猝死嘅新聞，嗰一刻，真係覺得自己都冇幾耐命。
微博圖片
微博圖片
可能你會覺得我誇張，但疑病有幾痛苦，冇經歷過嘅人係唔會明白，簡單講就係終日懷疑自己有唔同種類嘅絕症，小小唔妥就成驚弓之鳥。你話如果係意外，咁冇得講，都可以花啲時間說服自己呢啲係天意；但佢係身體毛病致死，喂大佬佢得35歲，我以前仲同佢做過一次訪問，好健康好精神，仲有做運動，就咁樣拍拍吓嘢都可以突然走咗，咁我呢啲食得差瞓得差，OT多運動少嘅，我係要搵個理由說服自己，點解我仲喺度？
上次余德丞執番條命已經嚇到鼻哥窿冇肉，今次係直頭嚇到靈魂出竅。我知係唔Rational，但控制唔到。
係好可惜，對佢印象好好，高大靚仔，斯文有型，謙虛有禮，彷彿你諗到一個男仔所有應該有嘅好處，佢都有。35歲係點樣嘅年齡呢？如非太早或太遲，正常就係半隻腳踏入穩定收成嘅階段，開始擺脫青年期嘅煩瑣雜念，專心發展事業同安頓家庭嘅年齡。你可以話係一個開始，事實上人生每日都係一個開始，一個應份有好收成嘅人失足，點可能係唔可惜嘅事？
高以翔嘅死，可怕，可惜，如果有命運，咁命運再一次令我失望。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
