【Now.com娛樂】歌神張學友嘅巡迴演唱會歷時兩年幾，終於來到尾聲喇，最後一站喺紅磡體育館完滿結束。學友自己都話，呢個演唱會已經成為佢同團隊們人生嘅一部份，而家曲終人散，有種「失業」嘅感覺呀！
學友喺演唱會嘅送禮環節之後，就話「其實只有香港站的演唱會才有握手這一個經典的環節，這也是香港演唱會的一個經典模式，所以說只要我們繼續努力，就證明了香港的表演模式依然是成功的！」學友就後仲逐一多謝演唱會嘅所有成員，令佢可以無後顧之憂咁去完成呢系列嘅巡演。之後仲一度哽咽，「不捨得完結的人是我，但叫停的人也是我。唱歌是我一生人最喜歡的事，但是我想繼續進步，不會停步於此，所以希望大家可以繼續支持我，希望在不久的將來能帶給大家一個更好的表演。」
除咗為歌迷帶來好歌，仲引咗唔少黃牛現身被捕之外，學友最令人敬佩嘅，就係為善不遺餘力啊！學友叫大家將演唱會嘅「花籃變善款」，加埋演唱會門票義賣，總共籌咗港幣110萬善款，認真唔話得！呢筆善款將會用作資助過萬位基層長者有免費中醫治療同三日藥費，真係要代一班公公婆婆多謝學友啊！
Text / KW
