0
0
〈娛樂乜乜乜〉華仔有心 商人無夢

〈娛樂乜乜乜〉華仔有心 商人無夢

〈娛樂乜乜乜〉華仔有心 商人無夢

【Now.com娛樂】前日先寫完希望演唱會業界做啲嘢,唔好出人命先後悔,尋日就見到宣佈劉德華演唱會不設排隊賣飛,真係要畀個讚華仔,呢啲咪叫著緊囉!對華仔嚟講,你都真係無得要求佢再做多啲,要做嘢嘅一直都唔應該係佢,歌手要出手處理呢啲其實對佢哋好唔公平。

個credit真係要畀晒華仔,嚴格來講,除咗警方拉咗幾個懷疑行兇者之外,係睇唔到有人做嘢。尤其業界,真正搵錢嗰批,佢哋有個叫「演出業協會」,主席係陳淑芬,其他成員都係演唱會搞手嘅高層,可以視為代表業界嘅一個組織。佢哋尋日發咗一個聲明,提出幾個建議措施取締黃牛黨,例如希望警方加強執法同埋提高刑罰,補返法例對黃牛嘅漏洞之餘,亦要立法管制啲炒飛網等等。

聽落好有計,其實咪又係出口術。你睇返個內容,首先只係建議,唔係施緊壓先啦,然後啲所謂建議,都係叫政府去做,自己完全無角色,你去監管啦,你去捉人啦,將所有成本轉晒落去政府度,人哋啋你都傻啦。老實講,呢啲都係需要做嘅嘢,而呢個協會都唔係第一次提出呢啲建議,但我哋從來唔會見到佢哋講自己會做啲乜喎!反而有人畀建議佢哋,佢就即刻識擋,叫佢搞搞個公開發售比例吖,佢哋話咁樣係「抱薪救火」,公開發售比例越高只會越多人加入炒飛喎。實名制又唔得,佢哋話以前亞博試過一次喇,好混亂,好擾民喎。

咁就奇喇,撥多啲飛去公開發售,增加供應喎,反而會助長炒風?咁當年老董八萬五,啲人唔使負資產啦!有時真係唔知啲生意佬講真定講笑,不如直接啲話佢哋會賺少咗,咪仲容易理解同接受?至於實名制,一開始就梗係會麻煩啦,有啲乜嘢改革係完全無痛㗎?我唔知佢舉亞博個例子係邊場,但點解唔舉久石讓、周國賢呢啲成功例子?講真我都唔認為實名制係完美解決方法,但你要反對一個咁大嘅聲音,係咪需要一個夠強嘅理由先得呢?

真心,成班大粒生意佬走埋一齊,都唔及一個劉德華,我講緊良心呀。

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

 

魯連FB專頁::https://www.facebook.com/lolinhk
  1. 更多
  1. 政府再收緊台星抵港者檢疫及檢測安排
    政府再收緊台星抵港者檢疫及檢測安排
    7小時前
  2. 紐時:蘋果為中國巿場將客戶資料儲存於中國國企伺服器
    紐時:蘋果為中國巿場將客戶資料儲存於中國國企伺服器
    5小時前
  3. 【5月18日疫情速報】(23:20)
    【5月18日疫情速報】(23:20)
    5小時前
  4. 過去兩周六人接種疫苗後死亡 專家委員會:與接種無關
    過去兩周六人接種疫苗後死亡 專家委員會:與接種無關
    6小時前
  5. 新加坡批准12至15歲青少年接種輝瑞新冠疫苗
    新加坡批准12至15歲青少年接種輝瑞新冠疫苗
    6小時前
  6. 最高人民法院院長周強會見首席法官張舉能
    最高人民法院院長周強會見首席法官張舉能
    6小時前
  7. 深圳華強北賽格大廈搖晃 初步判斷大廈自身結構造成
    深圳華強北賽格大廈搖晃 初步判斷大廈自身結構造成
    7小時前
  8. 【持續更新】新型冠狀病毒疫苗接種資訊
    【持續更新】新型冠狀病毒疫苗接種資訊
    7小時前
  9. 【政情】房屋問題料成中央選特首關鍵 林鄭梁振英隔空土地大辯論
    【政情】房屋問題料成中央選特首關鍵 林鄭梁振英隔空土地大辯論
    7小時前
  10. 台灣七家醫院有人確診感染新冠病毒
    台灣七家醫院有人確診感染新冠病毒
    7小時前