0
0
〈娛樂乜乜乜〉郭富城找數都畀人嫌,香港人真係出色

〈娛樂乜乜乜〉郭富城找數都畀人嫌,香港人真係出色

〈娛樂乜乜乜〉郭富城找數都畀人嫌,香港人真係出色

【Now.com娛樂】其實唔係有個page搵返23年前條訪問片出嚟,有無人真係會記得郭富城講過結婚會派利是畀全香港市民?可能有少部分人嘅,但我相信連睇過嘅都唔多,莫講話記得。可能係群眾壓力啦,又或者佢結婚生小朋友真係好開心,結果郭富城都走出嚟話會找數,但佢又講得啱喎,就算想派都唔係咁容易,唔通走勻全香港逐家逐戶派?定係要大家去佢屋企排隊,為封利是仔連車費時間都蝕埋?你又幫佢諗吓,佢又唔係庫房識得入落你戶口,直昇機空投又驚新年流流搶出個命案來,十八區都開個派利是站又好似派米賑災咁。廿幾年前一句戲言,當時係吹得大咗啲,但搞吓氣氛啫,佢都講過三十歲前唔會失身,唔通你又信佢三十歲先破處?有啲嘢咁大個人都應該識分真假,啲老闆年年都話經濟唔好要共渡時艱,今年凍薪下年會加番,又有邊次真?

但郭富城最後都肯找數,用一個都幾得體嘅方法,用香港人名義捐一筆錢畀聯合國兒童基金會,令人人都無啦啦做咗件善事,注意,真係無啦啦㗎,我哋乜都無做過㗎,即是有人話派利是畀你,你都應該親身去逗,講番幾句恭賀說話先叫有來有往吖,但你無咁做佢都仲預埋你算係咁啦!本來係一件好農曆新年式嘅開心事,有人起哄又有人肯洗錢,皆大歡喜,但唔知點解總有人嫌三嫌四。一陣又叫傳媒睇緊啲唔好畀郭富城好似成龍咁走數,一陣又核數師上身同佢計每人派1蚊利是都要捐800萬,買到兩架法拉利喎!佢肯唔肯捐咁多?如果捐得幾十萬每人先得1仙會唔會寒酸咗啲?佢好快啲報個實數出嚟喎!如果呢啲說話只係口痕搵嘢嚟講,其實無傷大雅。但啲人真係好認真㗎,好似郭富城真係欠咗佢哋咁㗎,「郭富城憑乜代表我捐錢?」咁樣都可以鬧得出,睇到呢啲除咗笑都唔知可以點。

香港人唔易服侍,睇怕郭富城以後都唔敢亂講嘢,哈哈!

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

  1. 更多
  1. 防護中心:暫有三十幾宗初步確診個案 三宗涉及護士
    防護中心:暫有三十幾宗初步確診個案 三宗涉及護士
    4小時前
  2. 入境處澄清絕無不人道對待被羈留人士
    入境處澄清絕無不人道對待被羈留人士
    9分鐘前
  3. 日跨黨派議員要求勿配合港府政治調查和引渡
    日跨黨派議員要求勿配合港府政治調查和引渡
    15分鐘前
  4. 港府:日本部分政客干涉中國內政及特區事務
    港府:日本部分政客干涉中國內政及特區事務
    15分鐘前
  5. ViuTV一名製作人員確診新冠病毒
    ViuTV一名製作人員確診新冠病毒
    23分鐘前
  6. 【8月12日疫情速報】(23:30)
    【8月12日疫情速報】(23:30)
    27分鐘前
  7. 蓬佩奧:中共用前蘇聯未有過的方式插手西方國家政經
    蓬佩奧:中共用前蘇聯未有過的方式插手西方國家政經
    35分鐘前
  8. 蘋果日報收警方信件 指封存涉法律保密特權證物七天
    蘋果日報收警方信件 指封存涉法律保密特權證物七天
    42分鐘前
  9. 【持續更新‧附群組圖】香港新型冠狀病毒肺炎確診個案追蹤
    【持續更新‧附群組圖】香港新型冠狀病毒肺炎確診個案追蹤
    1小時前
  10. 【時事全方位重點提要】(8月13日)
    【時事全方位重點提要】(8月13日)
    1小時前