0
0
〈娛樂乜乜乜〉你報高一尺佢報高一丈

〈娛樂乜乜乜〉你報高一尺佢報高一丈

〈娛樂乜乜乜〉你報高一尺佢報高一丈

【now.com娛樂】一張AngelaBaby同林志玲合照,又引來高度報大數疑雲,有人話林志玲175cm,AngelaBaby 168cm仲要著對超厚底波鞋,點解排排企仲係矮林志玲大半個頭?藝人高度嘅嘢係好難明㗎,係都要撐的話,你可以話可能林志玲報細數呢?或者林志玲對波鞋仲厚底呢?或者AngelaBaby生完之後鈣質流失所以矮咗呢?總之你有你質疑,佢唔答過幾日又無咗件事,謎團依然係謎團。

藝人身高由廿幾年前四大天王崛起時已經係一個謎團,當時啲人迷偶像迷得好緊要,唔止聽歌睇戲抽閃卡剪報紙背歌詞咁簡單,連偶像個profile都要背到熟,幾高幾重邊年出世咩星座讀邊間學校,記錯咗就唔係真fans。而你係唔會懷疑自己偶像嘅資料真偽嘅,因為呢啲數字嘢梗係有咁靚寫咁靚,高度報多幾吋,重量又輕十磅八磅,總之男型女索,樣靚仲要完美身型,反正又唔容易見佢真人,你迷得佢就梗係幻想佢完美㗎啦,唔通寧願佢短小精悍?但另一方面,你又會去挑剔敵對藝人嘅可信性喎,我黎明6呎高,你郭富城矮成個頭都有5呎9?咁黎明個頭咪得3吋?

好多鏡頭前睇落高大威猛嘅藝人,你見到真人係會吓一聲嘅,剛才講嘅郭富城,5呎3都俾多佢,反而黎明真人有接近6呎,應該差少少但水份唔高。同郭富城一樣身型嘅有李治廷,連手腳頭比例都似到足。劉德華做陳刀仔拍埋賭神周潤發度好似相差唔遠,實際又係差半個頭以上,未見過以為係巨人。有個出名唔高嘅功夫巨星,唔開名喇,佢最憎人話佢細粒,拍打戲遠鏡用替身,文戲企木箱,behind the scene好睇過佢啲戲。另外仲有個經歷,話說有個女性朋友好鍾意梁朝偉,《色,戒》睇足十幾次嗰種心心眼女fans,有次終如佢所願同朝偉合照,影完若有所失:「真係好靚仔但個比例好似錯錯哋咁嘅?」我覺得好好笑,唔知點解佢有資格嫌棄,講到好似朝偉高幾吋佢就有機會做情婦咁。

去到?模時期報大數情況更嚴重,因為?模成日被認為唔夠高所以無資格行天橋,所以越報越離譜,好似AngelaBaby同Janice Man差不多時間走紅,成日孖妹咁走出嚟,高度相若,一齊報有5呎6,實際上有嘅,如果著咗3吋高踭鞋的話。高度都算,三圍先嚴重,初頭唔明點解啲女仔明明話上圍有(舉例)34D,但影相又會叫你借件32B嘅泳衣,原來佢無咁大所以借細啲泳衣再墊兩個pad夾起就有34D嘅視覺效果,腰圍同下圍就例牌報細啦,肚腩仔影相時先縮起,pat pat執一執相就細晒,所以寫真永遠寫嘅嘢都唔係真。老實講,其實就算做藝人要出鏡都好,高矮肥瘦有乜所謂?香港人普遍就係五短身型啦,唔會你報高10%就多咗10% fans。同僭建一樣,數字本身對其他人影響好微,但誠信傷害大,你連身高都講大話,要人哋信你講嘢?有啲難度喎。

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

  1. 更多
  1. 楊潤雄希望九月可恢復面授課程 但要視乎疫情
    楊潤雄希望九月可恢復面授課程 但要視乎疫情
    10小時前
  2. 【8月3日疫情速報】(23:50)
    【8月3日疫情速報】(23:50)
    5小時前
  3. 一名郵差確診 灣仔郵政局需關閉消毒
    一名郵差確診 灣仔郵政局需關閉消毒
    5小時前
  4. 【持續更新‧附群組圖】香港新型冠狀病毒肺炎確診個案追蹤
    【持續更新‧附群組圖】香港新型冠狀病毒肺炎確診個案追蹤
    5小時前
  5. 政府:押後選舉有法理基礎 不會衝擊法治
    政府:押後選舉有法理基礎 不會衝擊法治
    5小時前
  6. 三名新冠病毒確診者死亡 累計38死
    三名新冠病毒確診者死亡 累計38死
    6小時前
  7. 世衛跟中國草擬調查新冠病毒源頭範圍
    世衛跟中國草擬調查新冠病毒源頭範圍
    6小時前
  8. 楊潤雄稱政府無參與大學解僱或不與教員續約決定
    楊潤雄稱政府無參與大學解僱或不與教員續約決定
    7小時前
  9. 林鄭冀社會別陰謀論看押後選舉 范太︰別太上心
    林鄭冀社會別陰謀論看押後選舉 范太︰別太上心
    8小時前
  10. 政府延長一系列防疫措施至下星期二
    政府延長一系列防疫措施至下星期二
    8小時前