0
0
〈娛樂乜乜乜〉演唱會門票實名制非完美 但好過唔做

〈娛樂乜乜乜〉演唱會門票實名制非完美 但好過唔做

〈娛樂乜乜乜〉演唱會門票實名制非完美 但好過唔做

【now.com娛樂】對於演唱會黃牛,真正歌迷痛恨,歌手亦痛恨。奈何無論主辦單位甚至是執法人員都見唔到有幾出力清剿黃牛,因而令佢哋越來越肆虐。事實上在香港呢個炒賣之都,一張原價幾百蚊門票隨時炒起三四倍甚至十幾倍,又無乜後果,你好難叫停一啲有門路買飛嘅人唔炒飛。最衰係佢炒到天咁高,又真係有人接貨喎!呢個係供求問題,一場演唱會八成門票扣起咗,得最多兩成公開發售,就算企通宵都唔夠排隊黨搶,演唱會宣傳又講到鬼咁勁,傳媒又煲到咁行,咁人哋真係好想睇嘛!唔買黃牛可以點啫?講真我幾十歲人真心想睇但又miss咗嘅演唱會數都數唔晒,但又唔見自己少忽肉,所以其實你仲有個選擇,就係放棄。

放棄唔難,但條氣唔順,每次啲飛都優先落在唔係最想睇嘅人手中,啲歌手都無奈㗎,明明半日就賣晒啲飛,之後仲要做多轉宣傳,好似幫緊啲黃牛去飛咁,然後自己就不停被歌迷咒罵。唔係無人提出過取締黃牛嘅方法,其中最多人講嘅係實名制,令買飛人無法轉售,日本、台灣都有用過呢個方法,算幾成功,但香港講咗咁多年都係得黎明舊年叫做試過一次,但無乜事後檢討,唔知做成點。最近又有周仔周國賢勇敢踏出呢一步,暫時嚟睇效果唔錯。佢只准一個account買四張飛,當然黃牛都可以開好多個account去買,但周仔又有一隊行動組逐張order去check,又上網搵黃牛account,一搵到就取消order,真係實牙實齒做返啲事。

若周國賢演唱會團隊發現有意圖炒賣門票的訂單,會在收集完整證據後,作取消資格處理。

當然實名制都唔係完美嘅方法,佢有唔少缺點,首先係好labour intensive,事前要花大量人力做查證工作,到開騷時要核對身份又要加多人手,成本高咗老闆唔會唔出聲囉。現場核實身份都係一個難題,好似紅館咁,都要排一輪先入到場,如果要set多個關卡對埋ID,成個入場程序會大幅拉長,隨時等多成個鐘都未開場。禁止轉售都係一個問題,因我哋想禁止嘅係高價轉售,咁同價轉讓呢?我唔舒服讓俾朋友睇得唔得?甚至乎買嚟當禮物送俾人呢?又得唔得?或者出咗少少意外,上網填form唔小心打錯個名咪無得入場?好多實行上嘅問題,令實名制一直難以落實,但世界上並無完美解決方法,唔係有缺點就唔可以做,實名制亦唔一定係打擊黃牛嘅終點,但起碼要有人行出第一步,後面嘅人再吸收佢嘅經驗慢慢改進,否則我哋呢世都要受黃牛氣。周仔,你係勁嘅!

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

  1. 更多
  1. 陳茂波:營辦商同意盡量減免儲值支付工具涉及費用
    陳茂波:營辦商同意盡量減免儲值支付工具涉及費用
    1小時前
  2. 【經緯線】在觀塘塞車的日子(二)
    【經緯線】在觀塘塞車的日子(二)
    7分鐘前
  3. 【經緯線】在觀塘塞車的日子(一)
    【經緯線】在觀塘塞車的日子(一)
    7分鐘前
  4. 港島太平洋酒店停止營運
    港島太平洋酒店停止營運
    43分鐘前
  5. 伊朗核設施電力故障
    伊朗核設施電力故障
    42分鐘前
  6. 美菲周一起重啟「肩並肩」年度聯合軍演
    美菲周一起重啟「肩並肩」年度聯合軍演
    42分鐘前
  7. 【4月11日疫情速報】(18:30)
    【4月11日疫情速報】(18:30)
    1小時前
  8. 印度單日新逾15萬宗新冠病毒確診個案
    印度單日新逾15萬宗新冠病毒確診個案
    1小時前
  9. 據報中朝邊境本月內解封 或先運送部分應急物資
    據報中朝邊境本月內解封 或先運送部分應急物資
    1小時前
  10. 韓美情報指北韓新型潛艇建造完畢
    韓美情報指北韓新型潛艇建造完畢
    2小時前