【now.com娛樂】袁彌明都算係一個奇女子。
又到話當年時間，廿年前佢出道作《初戀無限Touch》，我都有睇，係正喎！雖然戲份唔多，但令我眼前一亮。開始留意呢個人，間中都會見到佢啲model硬照出現在雜誌，冇記錯都有啲水著相睇吓，當年我以為，呢個只係一個清純嘅妹妹仔。
但我錯了，過幾年佢選港姐，叫做選唔到，得個旅遊大使豬肉獎，同屆贏嘅係葉翠翠、陸詩韻、林莉，全部身材好過佢，而自此葉翠翠成為佢眼中釘，不時整幾句潤吓佢，喂原來呢個女仔怨念都幾深。
感覺到佢好想紅，亦因此好易生事端，經常有同人鬧交新聞，鬧鬧吓鬧出個形象來，開始揸筆寫字，想做才女，香港近年流行以抽水為主嘅女寫手，佢係先驅之一。一個咁惹火嘅人，大台容不下佢，佢都算硬淨，被人拋棄過一次，就唔被電視台框住，開始遊牧式去唔同電視台做節目，亞視、港台、有線、now，全部都有佢出現，連網台都撈埋。佢唔紅，但佢冇死到，十年前佢仲做埋第一批youtuber，學人教化妝，當時梗係冇乜人睇啦，直頭冇人睇好呢個市場，覺得佢只係想多個渠道見人，冇人估到佢之後可以憑呢樣嘢撈得咁掂。
最記得佢聲大大咁話過葉翠翠整容，然後過兩年，自己竟然走去做整容代言！號稱收人一百萬，去做雙眼皮手術，又打針瘦面去皺紋，又睇清楚佢少少，原來都係個走位王，只要個勢好，今日的我隨時可以打倒昨日的我。雖然唔欣賞，但唔能夠否認香港成功嘅好多都係呢類人。
娛樂圈玩夠喇，估佢唔到，會走去從政。入咗人力，2012年同陳志全選立法會新界東，第二年仲做埋人力主席，再過多年嫁埋俾林雨陽。幾年從政經驗，你話佢成功咩？又未算，但話佢失敗？佢又做咗好多嘢，以一個30歲出頭嘅女仔嚟講，都好犀利喇，至少人人都識得佢政客呢個身份先。
然後呢幾日話你知，原來佢仲有8間舖，年賺成億咁滯，不過佢講嘢我都只敢信幾成，幾成都幾千萬啦！仲話要上市，聽住先啦，不過而家香港想上市都唔係冇可能，呢個世界咁多金主，可能過多一兩年，佢又多個身份，係上市公司主席。
講咁多，其實我係唔太鍾意呢個人，但又唔可以唔佩服佢，40歲未夠，佢可以做到咁多樣嘢，同時係模特兒 / 港姐 / 才女 / youtuber / 政客 / 人妻 / 老闆。時間大家都得咁多，一日24小時，但佢可以做到咁多嘢，我呢？連普普通通一個記者仔都未做得好，你話我邊有資格批評佢？就算佢肯教我都學唔識啦。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
