【now.com娛樂】各位男士，「澳門最大線上賭場上線啦！」呢句說話你聽過未？真係未聽過？定係扮未聽過？我敢講，9成香港男人都聽過，其實男人睇鹹網睇免費AV都已經唔係乜嘢羞恥事，幾個男人圍埋一齊可以大大聲討論，好多人仲以去日本做AV男優為夢想?！但調返轉，有個香港女人想去日本拍AV，就唔可以嘅，個個都鬧佢，係淫娃蕩婦，係雞係公廁。咁就奇喇，你睇就睇得咁開心，啲AV點嚟嘅呢？唔係女人拍出嚟，唔通係CG？係機械人？因乜解究做人咁虛偽，對同一件事裡面唔同嘅人有唔同價值觀？
其實香港都唔係第一次傳聞有人去日本拍AV，但每次都唔係事實，唔似得今次真係有個女仔走出嚟回應話佢想搵快錢所以去拍AV。雖然未成事，但最堅都係今次。我係唔反對，人哋嘅身體點樣用有佢嘅自由，但老實講我唔睇好佢在AV界嘅發展。
呢個女仔叫Chili，20歲，號稱上圍36G係佢嘅最大武器。我唔敢講咁嘅女仔周街都係，始終36G就唔易搵，但在日本AV界，就真係唔少，莫講係G級，H、I、J都已經好common，佢嘅武器在香港使得，去到日本就只係okay啦。樣貌亦只屬中等，20歲好年輕，但年輕過佢嘅AV女優又係大把。對日本人嚟講，最特別可能反而係佢來自香港，但呢啲gimmick嘢，拍多幾次就唔值錢，Chili去到日本，就算開頭順利，但持唔持久先係重點。
呢個係AV最血淋淋嘅事實。佢第一部可能真係有二十萬酬勞，但除非成功走紅，否則女優要搵錢，惟有以量取勝，一部幾千至一萬（港紙）不等。但係咪有咁多工開呢？又未必喎，一個月搏到盡可能都只係搵得幾萬蚊。講真呢個數就算唔去拍AV，留在香港做?模都有機會搵得到。
如果打算去一轉日本打響名堂，再返香港搵錢，咁樣更難行得通。我完全睇唔到有幾多job會夠膽搵佢做，總會有啲嘅，但大錢就唔使諗。亦可能有三級片會搞綽頭搵佢做女主角，但一來三級片唔多，二來既然AV都拍過，三級片就唔會有號召力，皆因三級片除咗賣色情，更重要係賣神秘感。因此返香港發展，並唔實際，但留在日本，又難以走紅，如果佢只係想搵錢，咁可能拍AV，會係一個勇敢但錯誤嘅選擇。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
