【 now.com娛樂】周柏豪轉唱片公司，簽約星夢娛樂，都幾估佢唔到。我對星夢零好感，印象只係一間唔識做音樂，同時又霸佔大氣電波嘅公司。開業幾年，真係紅咗邊個歌手？好似只得許廷鏗係經得起外面世界考驗，你唔會話鄭俊弘、吳若希、胡鴻鈞、鍾嘉欣呢啲係唔靠大台都搵到食嘅紅歌手啩？所以呢間唱片公司係特別嘅，一啖沙糖，一啖屎，有當紅歌手肯入去，記憶中係第一次。
呢間公司有乜好呢？都幾明顯嘅，大台嘅音樂節目、劇集主題曲、同埋大型綜藝節目，你唔使擔心，一定有你份，仲可以拍劇?！佢有慣性收視，淨係唱一首主題曲，成個月嘅黃金時間都聽到你把聲。佢有大量廣東省觀眾，咁周柏豪入去拍劇，你唔會俾個閒角佢啩？人哋拍電影都係男主角，入到大台都會係男一，輕輕鬆鬆就打得到大陸市場。而如果佢唔介意做土皇帝嘅話，大台而家排第一嘅男歌手就係佢，外面歌手幾紅都好，入到大台都要屈居佢之下，做一個大channel嘅一哥，都ok嘅。
咁呢間公司有乜唔好呢？就更明顯。入到去，一個歌手好似變得唔似一個歌手。因為星夢開咗幾年，最主要工作，就係以洗腦方式，試圖令一啲唔似歌手嘅人睇起嚟似歌手，佢哋要sell嘅product係演員同埋唱歌比賽嘅參賽者。周柏豪呢類已成名歌手佢哋冇做開，係咪真係識sell？我好懷疑。最大問題係周柏豪自己都花咗近十年時間先真正建立到佢嘅歌手形象，攀上一線，咁樣走入星夢，歌手形象會唔會被淡化？我覺得一定會。
話分兩頭，每個選擇都有好同唔好嘅地方，而家香港樂壇市道差成咁，你問我，好多嘢都係要睇錢份上，搵食啫，冇話啱唔啱，邊個俾得起錢，就去邊度，所以我估星夢簽佢個價應該幾靚。至於將來嘅嘢，邊個知？可能周柏豪過到去入晒屋呢？我都希望係咁，因為周柏豪呢個人，質地唔錯，值得有好發展。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
