【now.com】睇劉家昌與甄珍罵戰,幾十年恩怨情仇向公眾展示,互插得非常緊湊,但作為旁觀者,毫無「精彩」嘅感覺,反而有點淡淡哀傷,夾在中間嘅劉子千,原來咁坎坷。
此人一出世,有個明星老竇,明星阿媽,本來羨煞旁人。實情原來係佢自懂性以來,父母已經離婚,原因係老竇愛賭錢,賭到嫲嫲死咗,都仲賭緊錢去唔到喪禮送終。本來都冇乜嘢,離咗婚分成兩頭家都好,單親跟住阿媽都可以有幸福,但點知老竇老母離婚但要「瞞分」。老竇要面,仲要出嚟搵食,阿媽又係要面,唔想俾人知自己十年離兩次婚咁失敗,於是離咗婚都仲要扮一家人樂也融融,咁就害咗個細路。
從細劉子千就有對畸形父母,老竇在屋企燥狂郁吓就爆粗鬧人,對外就和善,形象係好老竇錫仔錫到燶,好多人以為佢縱壞個仔?!阿媽就為一個可笑理由受盡委屈,明明離咗婚,都走唔甩個衰老公嘅掌心。借錢還賭債都事少,受言語暴力又敢怒不敢言事大,咁細路仔會有眼睇,世界上最影響佢成長嘅兩個人都唔快樂,咁個細路自己點識快樂?
一直在家嘈屋閉中長大,感受唔到親情,但又要有父慈子孝嘅演技。忍耐到羽翼長成,準備飛走一刻,又被老竇拉住。原本佢大學畢業後想去外面發展,做個音樂人,佢老竇就逼佢返台灣唱老歌,本來唔肯,但老竇威脅佢,唔返嚟幫手就屈佢打老竇。咁冇計啦你玩到咁大,結果真係紅咗,但變成一個華人界嘅大笑話,一首《唸你》唱到街知巷聞,到而家好多人仲笑緊,實不相瞞我當年都有用嚟做電話鈴聲。經此一首歌,基本上佢嘅夢想已經破滅,冇可能再做一個正正經經嘅音樂人。
但佢繼續忍,阿媽唔出聲佢都唔敢講嘢,人人都當佢老竇係音樂教父,邊個會信個細路講嘢?惟有苦笑住咁吞咗佢。好啦,絕咗反抗嘅念頭,老竇話點就點啦,你要佢扮父子情深咪扮囉,你要所有人覺得佢係裙腳仔咪做俾你囉。但你又走去蝦個阿媽,甄珍胃癌剛剛開完刀,劉家昌就即刻逼佢上電視節目,咩人嚟㗎?劉子千夾在中間幫唔到手,可以想像有幾無助。然後又忍咗多年,個老竇突然公開鬧佢係畜生,有個咁痴線嘅老竇真係唔知佢想點,可憐嘅劉子千30歲人仲係活在佢嘅陰影底下。
真係好想趁今次機會同劉子千講聲唔好意思,笑咗你咁多年,你嘅委屈,我都有份。希望你都可以趁今次父母攤牌嘅機會,脫離家庭陰影重新做人,以後你唱乜、做乜,我都撐你,講堅嘅。
文:魯連
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。
專欄屬作者個人意見,不代表本網立場