【now.com娛樂】又係睇報紙，今次睇到周柏豪同佢老婆去筲箕灣食碗米線都要見報，其實又唔係衰嘢，都唔緊要，但得意在咁都寫到成千字出嚟，由碗米線講到佢老婆再講到佢當年驚恐症嘅往事。識得柏豪好多年了，由佢07年簽華納已認識，十年來做過無數次訪問，但都冇聽過原來佢曾經有驚恐症。或者佢有提過，但我冇留意，因為當我冇情緒病時，就算聽到有人話自己有驚恐症，係唔會覺得有乜特別的。
報紙寫佢因為呢個病，當年足足九個月冇出街，佢好犀利呀，之後唔止醫好個病，仲簽埋唱片公司出道，完全克服自己嘅恐懼，可以好好享受工作同生活。好理解佢點解可以九個月都唔出街，因為前幾年，我都試過，又係驚恐症。因為呢個病我辭咗工，在屋企休息八個月，美其名係休息，其實係匿埋唔敢出去，嗰段日子有幾辛苦，真係刻骨銘心。
上網一搵就知，驚恐症係焦慮症嘅一種，係一種情緒病，但老實講你唔係懷疑自己有情緒病的話，係唔會無端端走去search。所以情緒病患者普遍都有個願望，就係希望普羅大眾認識情緒病。一來情緒病真係好common，越早認識就越識得處理；二來唔使每次見到親戚朋友就要解釋一次自己做乜事，最好可以好似感冒咁，同你講感冒兩隻字，你就知我流鼻水、喉嚨痛、咳。
我有無數向人講解驚恐症嘅經驗，每次講到口水都乾，對方都未係好明，然後通常都會得到一句安慰：「冇事架，你唔好咁驚咪得囉！」我個病就係控制唔到自己去驚，人人就叫我唔好驚，真係唔該晒！所以每次遇到朋友問候，都覺得好攰，唔熟嘅真係求其話自己想休息吓就算。
驚恐症有好多唔同病徵，我唔知柏豪病徵係乜，我自己嘅主要症狀就係暈。我人生第一次panic attack，就係在鬧市行行吓突然行唔到落去，覺得下一步就會暈低，即刻搵嘢扶住，休息一陣即刻截的士去急症室。去到醫院check咗成晚，結論係我好健康乜事都冇。
出院之後症狀又出現，除咗瞓著覺之外嘅時間，由朝到晚無間段地暈。原來暈都可以好講究，有人暈到天旋地轉，有人頭重腳輕，我就係暈到好似飄浮一樣，踩落地係冇力嘅，行路冇實在感，好似每一步都會跌咁樣。有兩三日時間，出門口暈到行唔過屋企前面個街口，除咗暈，仲有痛，心口痛下腹痛頸側痛，同埋四肢麻痺。
一個健康嘅人點解會咁？係咪有隱疾絕症？於是我辭咗份工，散盡家財（原本就冇乜）不斷去睇醫生。做全身檢查，冇事；睇中醫，話血虛，食中藥，但無效；朋友介紹一個隱世氣功神醫，乜都冇講，震咗我背脊幾次，又係冇效；脊醫又睇過，由頸椎到尾龍骨，除正常損耗外，又係正常。
每日我就躲在屋企google，正所謂久病成醫，我幾乎學識所有同頭暈有關嘅病。醫生越話我冇事，我就越search得起勁，越search得起勁，我就越驚，事關網上啲資料唔恐怖嘅唔寫，真係唔好睇咁多。就在我以為會死於一個連自己都唔知咩病嘅情況下，終於諗到不如試下睇心理醫生。
其實咁遲先諗到心理醫生係有兩個原因，第一係想像唔到心理病嘅病徵全部都係生理性嘅，第二係我從來都係個天不怕地不怕千金散盡先諗開飯嘅人，實在聯想唔到有乜需要焦慮同驚恐？但心理醫生同心理輔導，就好似重新賜給我新生一樣，藥到病除咗大半，再重新學行學走學思考，雖然未敢講已完全康復，但起碼可以重回正常生活。
至今幾年，我仲食緊藥，劑量好輕，到而家我都唔知最初為乜而恐懼。但長期體驗，領會到一樣只有病患先明嘅道理，就係我係為自己嘅焦慮而焦慮，為自己嘅恐懼而恐懼。今日篇文有啲長，又講自己嘢，悶親大家請多多包涵。借題發揮寫咁多字，實在係不吐不快之餘，亦想搵同類，有同感嘅人，可唔可以舉舉手，一齊取暖？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
