【now.com娛樂】上次寫完Hidden Agenda被放蛇，外國樂隊可以用冇工作簽證為由被拉返差館，成為國際笑話之餘，亦突顯出在香港做獨立音樂有幾難，想搵個Live House做表演都唔得！
噚日就立即傳出謠言，五月天個紅館騷都係冇攞工作證嘅，咁大件事，當然即刻被否認。傳謠言嘅人引來恐慌當然唔啱，但我完全理解個謠言係點嚟，因為香港一年都唔知有幾多外國音樂單位嚟香港交流，而同時攞工作證需時甚長，甚至未必攞到，非常影響各大節目編排。要明白唔係個個場館都好似紅館咁要入咁耐紙嘛，所以攞工作證來香港表演，並唔係一個必然習慣，或者咁講，大部分都唔會攞。因為從來都冇咁嘅意識，人哋嚟真係諗住表演唔係打工㗎嘛！
可以想像今次事件在好多人眼中，係選擇性執法，嗰種憤慨可想而知，轉而去質疑一啲巨星單位，例如今次嘅五月天，有冇攞工作證，係好自然嘅事。嚟緊BTS防彈少年團呀、SHINee呀、林宥嘉呀、Britney Spears呀，全部都有可能成為被懷疑目標。不過無論佢哋有攞冇攞，我相信都唔會有大影響，話明係選擇性執法，唔通入境處會去紅館、亞博館執法？呢啲大型嘅、令香港睇起嚟歌舞昇平嘅絕對可以放心繼續搞，係啲小眾嘅、去一啲被針對場所搞嘅音樂文化表演要被打壓啫。
如果香港係一個蘋果，從外表睇，佢冇事一樣㗎，係裡面爛咗，蛀咗少少啫，連個蘋果本身都可能唔覺有問題，因為問題未開始放大嘛。如果工作證問題以後真係揸正嚟做，我真係睇唔到Hidden Agenda，甚至比佢更細嘅Live House，或者其他更細嘅表演場地，可以點做落去。只做本地樂團講就當然容易，但實際上呢啲細場地都需要外國單位去帶旺個場，個場唔旺搵鬼睇咩？呢個係定律嚟。同埋交流呢個作用都好緊要，唔係個個都想睇或有錢睇嗰啲炒到天價嘅主流樂團，平平哋聽吓地下音樂或者小眾藝術都得啩？?家你話我聽可以去邊度做呢件事？個選擇去咗邊？雖然有呢個需求嘅人唔係多數，但少數人係咪就要咁樣被社會犧牲？
呢個係一個好嚴肅嘅問題，我哋人少唔代表就可以被隨意搓圓撳扁，但香港就係一個小眾聲音好難發得出聲嘅地方，大都市嘛，你有錢想點走灰色地帶都得，你冇錢，少少淺灰都唔俾你行，係要咁樣逼到人都癲先安樂。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
