【now.com娛樂】估唔到我魯連都有企喺陳冠希嗰邊嘅一日。唔知大家睇咗am730在機場「訪問」陳冠希條片未？都好大迴響下，話說陳生落機，塊面都黑色㗎喇，女記者上前問佢幾句，佢頭幾句已好聲好氣叫人唔好問，女記者冇理繼續問，陳生就即刻反面鬧爆。真係隔住個mon我都感受到揸cam攝記嘅興奮，今次「機場更」唔使食白果喇！仲唔攞部機隊實你？郁手吖，郁手上埋港聞仲高興，結果跟到陳生上車都仲畀人鬧緊，佢都算長氣。
所謂「機場更」，有兩種玩法，第一種係收到料有星落機，就在機場伏佢要佢回應某啲敏感新聞。要知道除非你行到特別通道，否則出閘到停車場最少都有幾分鐘路程，夠問好多嘢喇。第二種玩法係報紙玩法，報紙要填滿幾版紙，當嗰排冇新聞，就會開「機場更」，派兩個記者戇居居坐機場等運到，確實係非常浪費生命，我相信陳冠希就係咁樣撞到。題外話，唔好以為個個星都唔鍾意落機撞到記者，有啲人會好享受，話說多年前有位天王落機，名就唔開啦，佢落機見到記者但記者可能發緊夢見唔到佢，佢助手即刻打晒畀各大報館鬧爆，結果搞到天王要「扮」多次落機，俾記者仆埋去影，佢仲要扮Cool唔答問題，好笑，但我覺得佢都有啲病態。
講返正題，記者最錯唔係跟住陳生，而係跟完再開佢波，意圖寫臭佢。當然陳生個態度都擺明係衰，邊需要去到鬧人嘅地步呢？唔出聲行咗去唔得嘅，根本就係順便發洩，但人哋今次又有個正當理由去發脾氣呀，而呢個理由係跟住佢嘅記者送畀佢嘅。一個錯，遇著個更錯，就變成啱。
通常呢類「採訪」（娛樂版真係當呢種係採訪，但我個人覺得毫無意義）唔會咁處理，唔會成條片擺出嚟，點都有啲剪接，幾個鏡頭就夠啦，剪到陳生好似癲狗咁一出嚟就吠，蝦個楚楚可憐嘅女記者。其實唔難，陳生一定好配合，因為所有娛記都知道佢十次被人跟八次都嚟料，即是撞到陳冠希就有80%機會交到功課。你覺得呢種做法心地差？我覺得?家個做法仲差幾倍，成條片由開頭佢出閘到送埋佢上車，幾乎一Shot過放上網畀讀者睇晒，潛台詞係乜？就係「陳冠希你今次仲唔死？」記者都不知幾有信心，覺得自己行得正企得正，係你陳冠希無啦啦失控，逼個女記者埋牆，咁就畀大家睇吓你有幾癲，仲唔公審你？
殊不知呢種踩界嘅「採訪」方式，本身係有佢唔正當嘅地方，並不為世人認同。做娛記嘅可能做得太耐，覺得呢啲唔正當係理所當然，咁就弊喇，審判別人變成審判自己。杜汶澤引用聖經話「你們中間誰是沒有罪的，誰就可以先拿石頭打她。」我就話做傳媒攞石頭掉人時要掉準啲，唔好變成掉自己隻腳，張開雙眼見識吓呢個世界，唔好淨係困在自己個圈子裡面。有啲嘢，已經唔合時宜，例如價值觀，負面如陳冠希都正義過你，就係時候檢討吓啦。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
