【now.com娛樂】台灣的谷阿莫終於被電影公司告，唔怕老實同大家講，我等咗呢個Moment好耐。無論告得成又好，告唔成都好，點都應該告一告，就用法律去話畀大家知，係唔係過癮好笑，多人鍾意睇，就可以完全無視版權？
我一開始都睇咗唔少谷阿莫嘅《X分鐘看完XX電影》系列，有啲係幾好笑嘅，但漸漸發現佢嘅評論穿插大量冇公開電影片段，即是套戲仲上緊，電影公司又冇剪落預告度，片段喺邊度嚟？答案呼之欲出啦，但我唔評論呢個來源，因為重點係嗰啲片段係電影公司所有，無論任何來源得返嚟，都唔應該喺電影上映期間或之前攞嚟用。呢個係行規，同時亦係Common Sense，更係好基本嘅道德操守，但發現呢啲基本尊重越少，佢就越受歡迎。佢走紅我唔覺得有乜問題，佢一定有自己受歡迎嘅個人特質，但對於版權被踐踏，個人感覺非常無奈。
都唔好淨係講台灣，香港都有唔少呢啲例子，例如一個好多人睇但我從來唔知佢點攞到啲片嚟用嘅網站，C字頭嘅，就成日用大量電影片段，重新剪接同配音，變成另一個故事。聞說呢個頻道係由一個新晉電影人主理，究竟佢哋用嘅片段有冇得到電影公司批准呢？可能佢有，但我睇唔到有Credit，咁冇Credit我就估佢冇啦，電影公司邊有咁好死（笑）？
其實都幾誇張，我第一次睇佢哋係剪咗《黑社會》做另一條搞笑片，條片成6分鐘，當時好奇怪點解銀河映像會咁識玩？後來問返先知唔關銀河事，係人哋自己攞嚟剪。之後陸續都有其他電影被所謂二次創作，但我相信，好多人覺得呢間C字頭其實係益緊啲電影公司，「唔係佢哋搵鬼人睇啦！」大把人咁諗，我感覺到呢個係一個潮流。
咁係咪我唔支持二次創作？唔係啊，我好支持，但二次創作條線從來都模糊，起碼都應該建基於兩點。第一係要有付出，難聽講句，而家谷阿莫同嗰間C字頭，邊有二次創作？頂盡咪1.5次！你話自己搵過批演員，拍過啲片，去扮返電影橋段甚至燈光鏡頭美術，都起碼係做過啲嘢，?家係直接攞人哋嘅嚟用，人哋出雞你出豉油，一個人剪接做埋配音就搞掂（嗱我冇話易做呀吓），然後話呢隻係自己隻雞，係咪要嬲呢？
你會問咁其他人改歌詞改圖又點計啊？一樣都係出豉油啫。答案就在第二點，你有冇用嚟賺錢呀？谷阿莫啲片放YouTube收緊幾多錢？C字頭你唔係以為係非牟利機構嘛？養緊一個Media喎！你改人張相嚟賺錢即係廣告硬照啦，你改人首歌賺錢即係廣告歌啦，都係要畀錢㗎！咁你改人套戲嚟賺錢點解會免費呢？若你相信呢個社會有收穫應該要有付出，若你認同二次創作不應成為不勞而獲嘅保護色，我覺得，冇理由唔認真同佢計一計。為真正嘅二次創作著想，有時塞返個漏洞都係一種捍衛。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
