【now.com娛樂】伊能靜一家三口參加大陸真人騷《媽媽是超人2》，睇過真人騷都知，美其名係拍好嘅一面，今次即是想拍吓媽媽愛心爆棚嘅湊仔場面啦，但實際上如若你出醜的話，監製一定仲開心，因為真人騷最需要話題，唔係的話拍乜嘢真人騷？，畀份稿你拍Set up就得啦。果然今次媽媽是「超人」，變成媽媽是「超級大意人」，在大庭廣眾下將個女放落高椅時，唔知係咪想聽電話，居然未放穩就縮手，錯手將個女跌落地。成米高呀陰功，好在最後冇大礙。
因為四圍都擺滿鏡頭，所以基本上成個過程都睇得好清楚，由BB墜地，到場地內各人反應，由頭到尾都睇晒。伊能靜嘅反應好奇怪，可能受驚過度啦，佢抱返起BB第一時間係冇撿查BB有冇受傷，只係抱咗俾佢老公呵返。到佢自己走入廚房傷心自摑，再抱住BB喊，一家三口攬埋一齊，過程都幾長時間。我睇時心諗，係咪有病啊？仲乜唔即刻送去醫院先？要知道BB個頭有著地其實可大可小，大人跌親個頭都應該去醫院Check吓啦，何況1歲都未夠嘅BB？同樣作為一個父親，我覺得自己好似肉緊過佢，有冇搞錯！
另一個奇怪嘅地方係，BB跌低咗，佢自責到自摑同埋喊，但佢好似冇意識到自己根本去錯地方，仍然繼續俾攝影機拍埋佢，做埋個節目。可能有人覺得呢個係專業啦，但我自己就覺得不能接受，尤其BB跌親整個拍攝團隊就好似局外人一樣，BB冇事啦，繼續Roll機，唔好錯過呢啲咁難得嘅場面。都冷血嘅，仲拍乜鬼啫？為人父母，梗係應該處理好件事先返去再善後，個騷緊要定個女緊要？鏡頭已經話咗畀你知佢哋點揀。
伊能靜自責冇放好個女，我覺得佢直頭係放錯地方，家居意外可怕嘅地方係，如果你真係咁粗心大意，係可以在任何時間任何地方發生，要跌，BB在屋企都可以跌。父母唔係聖人，但都有天職，就係盡能力在孩子未成長之前，將孩子放在安全地方。咁真人騷片場好明顯就唔係安全地方啦，又要顧節目內容，又要顧四面八方嘅鏡頭，又要傾偈，又要聽電話，又要湊女，你顧得邊樣？仲有冇能力將佢安全放在第一位？
如果係簡簡單單嘅訪問，其實冇乜所謂。但係要帶個BB去拍一個長時間嘅真人騷，真係有乜必要？所以佢最錯嘅唔係未放好個女，而係放錯地方，放在一個唔安全嘅環境。佢個心唔係諗住犧牲個女去搵錢，呢個我信，但結果係犧牲咗。要工作就父母自己去做啦，搵奶粉錢都係為仔女啫，結果搞著啲細嘅，係咪本末倒置呢？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
