【now.com】鄧兆尊有三個女朋友已經唔係新聞，最近又有報道話，影到佢再添一個女朋友，不過鄧兆尊已經否認咗，佢話暫時三個夠晒數。又係嘅，已經坐擁Carmen、車厘子、Claire，再整多個真係未必吃得消。三個女朋友雖然唔係住埋一齊，但一樣住在灣仔區，鄧兆尊要享齊人之福都好就腳，事實上好多灣仔街坊都見過佢哋「一家人」齊人出動。
報道出咗，好多人焦點落在批評鄧兆尊揀女朋友特別嘅品味，其實鹹魚青菜各有所愛，佢鍾意就得啦。我反而好佩服佢，唔係羨慕，係佩服，一個男人可以handle到三個女朋友，同時又有好多生意，難怪佢身家億億聲。當然當年佢老竇有留身家畀佢，但同時佢都係投資有道。最重要一點，根本係「曠世管理人才」，咁有錢唔係冇理由。有人覺得一腳踏三船唔難呀，夠膽就得，當然踏到幾耐就睇平衡力啦。錯！?家佢可以令到三女願意共侍一夫，唔知有冇暗鬥啦，起碼冇明爭，你估易呀？
一拖三開開心心一齊行街shopping，一齊食餐安樂茶飯，唔係有錢就做得到，君不見幾多有錢佬都要分開幾房先勉強搞得掂。你估女人咁易氹咩？一個女人都已經夠忙，最基本地對待一個伴侶，既要關心佢生活，又要體諒佢心情，了解佢需要。你要安排足夠時間陪佢，有乜頭暈身㷫，要照顧佢，佢唔開心唔滿意，要幫佢解決問題。基本上返工之外時間，都幾乎要貢獻出嚟。
何況?家鄧兆尊有三個，可想而知要分身有術。雖然可能有三倍快活，但同時都係三倍頻撲，三倍痛苦。真係高投資，高回報，享齊人之福，同時受齊人之苦。
唔好睇鄧兆尊成日做啲傻更更角色，佢係聰明人，三房都唔過門，個個都係女朋友，連將來爭產都免埋。若生於古代，鄧兆尊肯定係做皇帝嘅材料，後宮佳麗三千，佢隨時訓練成一支軍隊。當連世界上最難搞嘅女人都搞得掂，仲有乜佢搞唔掂嘅事？佢天生有政治手腕，就算要佢治國，都唔會難得到佢。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
