【now.com】近來事忙，本來都冇留意嗰單的士佬影低後座乘客餵人奶再擺上網嘅新聞，直到見到楊千嬅都鬧，我先見識到呢件咁痴線嘅事。呢個世代，做人老母甚艱難，唔好講乜鬼贏在起跑線住先，?家連條乳腺都就快失守，個社會究竟係咪想逼啲媽媽去死？
去體驗吓就知，而家生BB，無論去公立定係私家，醫生同姑娘一定會逼你餵母乳，冇錯係逼，唔係鼓勵，無論你上唔上到奶，你唔餵母乳佢就會講到你好似想害死個BB一樣。去母嬰健康院又係，理得你個媽媽傷口埋得好唔好，食得夠唔夠營養，淨係問你母乳餵成點。「吓？你補奶粉？咁懶都得嘅？」
一個政策撻落嚟，推行母乳餵哺，就所有部門響應，香港所有新手老母唔餵母乳就好似罪犯一樣，去到邊都被人鬧，根本無處可逃。我想問，我哋呢啲食奶粉大嘅，有冇生少唿肉？你鼓勵餵母乳本來係好事，但去到一個接近強逼洗腦地步，對於因為種種問題唔可以完全餵母乳嘅媽媽，構成極大壓力，嚴重影響母親心理平衡，會唔會太本末倒置？
好啦你係咁逼媽媽餵母乳，配套呢？媽媽放完產假梗係要返工，屋企多件化骨龍仲唔返工邊有錢供樓或交租？媽媽返工要餵母乳，惟有在公司泵奶，衞生署係有一個「母乳餵哺友善工作間」指引，鼓勵僱主畀時間畀地方媽媽泵奶，問題係呢個唔係強制性，屬僱主自願，大公司顧及企業形象，好多都有跟從，但細公司好多老闆仲好似原始人咁，一日走開兩次每次半個鐘，已經好唔高興，要佢畀間房你，夠膽死叫你去廁所泵奶（唔係講笑呢個係好多人嘅經歷），李老闆不如你去廁所食餐飯嚟睇吓先啦？廁所係要嚟屙屎，唔係用嚟準備BB食物㗎。
帶BB出街又係另一種絕望，要搵到哺乳室難如登天，BB嗌肚餓，行到去哺乳室佢都已經喊到失聲。堅持唔餵奶粉的話，媽媽就要鼓起勇氣，在公眾地方餵，試過去飲茶，朋友用圍巾包住BB餵奶，其實從外面係乜都睇唔到，隔離枱一家幾口「㗩㗩㗩」㗩足成餐飯，唔係啲嘢好好食，而係㗩緊我朋友，擺明覺得佢傷風敗德。大佬，你嚟飲茶就蝦餃燒賣叉燒包食到飽，BB就匿埋圍巾下面食都唔畀？在華人社會，呢啲保守眼光永遠唔會消失，你政府幾時教育吓呢班「㗩㗩獸」？
順便教育埋嗰班好似未見過女人一樣嘅變態佬，即是揸的士影人餵奶然後放上網嗰個，我真係諗唔到一個位可以體諒佢，唔鍾意人哋在車上餵奶，你咪開聲囉，擺上網做乜鬼？用個腦諗吓，如果個媽媽唔係逼於無奈，會唔會拉開件衫畀個乳房你見到？對於一個豁出去餵奶嘅媽媽，冇半點敬畏，冇半點憐憫，選擇落井下石，有人唔做，係都要做禽獸，整個的士業界都因你蒙羞。仲有嗰啲喺公司雪櫃偷人奶嘅賤人（再次地唔係講笑真係好多人嘅經歷！），我真係唔明偷嚟做乜，就算隔離有罐可樂你都係要偷支人奶，即是唔係口渴啦，惟一解釋係呢種人，將母乳同性產生聯想，即是佢攞住支奶，幻想吸啜乳頭就覺得興奮，你話幾可悲。人奶小偷，我認真同你講，你有病呀，真係病嚟㗎，去睇醫生啦！
可憐香港餵母乳嘅媽媽，為咗BB健康啲，要頂住壓力，受盡白眼。係，母乳係好，但媽媽都係人，點解個個都剩係關心個BB健康，忽略媽媽苦況？真係頂唔順不如餵奶粉算，使死咩？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
