【now.com】見到劉鑾雄（大劉）發聲明，每隻字都好似一張刀，割斷同呂麗君嘅關係，突然想借題感慨一下，講吓娛記眼中大劉呢個人。香港唔少超級富豪，但講到娛記最熟同最有感情嘅，一定係大劉。借用黎明金句，有冇機會影到大劉張相，埋唔埋到佢兩米範圍內，同見鬼一樣，係要講緣份嘅。
大劉同其他超級富豪唔同嘅地方，係佢江湖味好重，當然有更重嘅，亦唔係話爛仔嗰種江湖味，而係佢嗰種愛恨分明，就好似電影裡面嘅江湖人物一樣。單單講追訪佢嘅記者，鍾意就錫到燶，好似甘比咁做埋佢女人都仲得；唔鍾意嘅就連你個樣都唔想見到，幾米遠已經叫保鏢推開你。就係因為咁嘅性格，佢先咁受娛樂版歡迎，突如其來嘅情緒，令佢會講出一啲你想像唔到一個超級富豪會講得出嘅說話，夠你做幾星期頭條。
如果比喻成一個學科，去跟大劉就好似讀醫要再考專科咁，係名人版裡面嘅一門專科，過程痛苦，但回報高。大劉認人好叻，應該話佢好憎生面口人接近自己。幾乎每個名人版記者同娛樂攝記都經歷過去福臨門等大劉食飯出入嘅經驗，福臨門係佢飯堂，記者有嘢想問佢就每日去門口等，佢見得多嘅當你唔存在，已經好好，生面口嘅開口就鬧：「你行咁埋做乜嘢呀？」可以同佢傾到計嘅記者，五隻手指數得晒。行內所有人都知道做大劉要保持距離，你當係基本禮貌啦，試過有新人唔醒目，扑咪時唔小心扑到大劉個頭，大劉嬲到想食咗佢咁，都咪話唔驚。
咁難做，但佢又真係好多料爆，感情生活豐富，從元配寶詠琴年代開始，已好似拍戲一樣，離婚後互相指責，連絕子絕孫不得好死嘅毒誓都講得出。之後兩任入室「女友」，加上無數緋聞，總之你有能力同夠膽觸動到大劉情緒，或者佢突然興起，佢就會畀到出其不意嘅回應你，好似今次發聲明咁，下下都好似核彈咁爆。
所以近年見到大劉身體大不如前，出入都唔太方便，然後又處理家產同女人，都幾感慨。惟一值得慶幸，就係佢可以在仍然在生時，搞清楚所有錢銀關係，起碼將來走咗之後，後人唔使爭得咁辛苦先，需要安寧嘅人會得到安寧。唉，作為一個娛記，見到大劉咁樣，我都心極痛。呂麗君畀蘋果個回應覆得幾好，真係乜都假，最緊要早日康復，錢多又點，健康買唔到。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
