【now.com】好耐冇見嘅李珊珊最近見報，話說佢想拍賣自己嘅港姐后冠做善事，有晒全盤計劃，但結果社會福利署唔批准，最主要問題係佢唔係註冊慈善機構，一般個人申請都唔會批准。網上有唔少意見都話，其實李珊珊用自己名義拍賣后冠，然後捐錢去慈善機構咪得囉，使乜搞到咁麻煩？我覺得捐后冠拍賣到幾多錢唔係重點，重點係李珊珊想用自己方法做善事，可能佢想要個noise，令更多人效法佢咁做呢？或者佢想draw更多人關注佢個議題呢？
呢樣嘢可以發生在任何有心人身上，或者好多人都會有咁嘅經驗，突然有日諗到條橋想做，覺得可以幫到人，但條橋同一般主流方法唔同，然後你去認真諗點樣可以做得成嘅時候，會發覺總有好多步驟得唔到法律保障，關於慈善籌款，基本上仍然停留在幾十年前做法，可以改變嘅只有少部分內容，於是唔少創新嘅慈善橋最終都好難成功，因為冇可能要法律遷就你。
但冇辦法，牽涉到金錢的話，你冇得唔跟遊戲規則，否則真係監都有得坐，怪只怪香港法律欠缺彈性，唔能夠與時並進。所以李珊珊處於兩難情況並唔難理解，若要跟足指引去做，一係你自己註冊成慈善機構，咁佢都講過今次係幾個人偶然想做呢件事，當然唔會；一係就同其他註冊慈善機構合作搞，呢個又係極度麻煩嘅事，首先係主導權問題，其次慈善機構嘅規矩都唔見得比政府少，你估在香港做慈善機構好容易咩？
但若想社署放寬你一次，或者破例幫你全程監察，就更冇可能，話明官僚，永遠都係多一事不如少一事。佢唔係唔會破例，但絕對唔會為你李珊珊一個市民去做，你係TVB佢咪可能會囉，或者你係達官貴人，講句說話好大影響力，又可能會囉。又或者你有辦法令大部分市民關注事件，成為一個社會問題，又有可能囉。
呢度係香港，係唔公平㗎喇。但撇除呢種唔公平，慈善的確唔可以隨便放寬，因為好多人會藉此騙財。香港地有錢搵，乜都做得出，搵班阿公阿婆走出街犯法籌款又有，開個假Facebook page自稱籌款幫受害人又有，做假新聞再為唔存在嘅受害人籌款又有，開個假狗場呃你捐錢又有，咁你放寬得幾多？香港實在有太多人立心不良，將好事變壞事，最慘係令真係想為社會帶來一點改變嘅人，例如李珊珊，完全做唔到嘢，咁樣社會又點會變好？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
