0
0
〈娛樂乜乜乜〉天真有邪最可怕

〈娛樂乜乜乜〉天真有邪最可怕

【now.com】今日係萬聖節，係咪準備好一套戰衣，扮鬼扮馬玩番晚？今年最多人扮係咩角色？唔使估喇，年中一套《自殺特攻：超能暴隊》，令一街都係小丑女，當然投其所好扮埋小丑的男伴都為數不少，如果你今晚打算用呢個造型出街，小心撞嘭嘭聲。

驚慄電影的角色，通常都成為萬聖節熱門的扮演對象，但個人覺得最可怕的角色，往往是一些由小朋友擔演的，那是源於本是天真無邪的身份，突然含有充斥一股邪氣，是最叫人驚心動魄，周身唔自在。今次就同大家數番幾個愈天真愈具邪氣的經典角色，有冇興趣今晚反老還童，扮個加大版？就好似上日網上流傳一條疑似來自台灣的短片，有家長要小朋友扮上《千與千尋》的無面男角色，結果大受歡迎，短片在數天內瘋傳，可見童男童女真係有價有市。

要數最經典的邪童，莫過於來自《驅魔人》的鬼上身女童，360度自轉的頭顱，在缺乏電腦特技的70年代，簡直看得人嘩然，然後仲要猛力勁吐嘅綠色嘔吐物，隔住個銀幕都好似聞到陣味咁，仲有拱橋姿勢落樓梯，兼以流利粗口問候牧師，以40幾年前的尺度計，係爆晒燈。

唔知關唔關《驅魔人》事，小朋友邪靈附身似乎好有市場，數年後另一驚慄經典《凶兆》登場，今次唔係鬼上身，直頭係做魔鬼之子。頭頂上印有666的胎記，成為日後魔鬼象徵。戲中個小朋友明明可愛至極，但只要對他不利，不幸的事便會接連發生，就連收養他的父母都惹來殺身之禍。續集講撒旦之子成長，一樣殺人不見血，一個眼神已經令人窒息埋單，而佢個結局就要睇到第三集成人篇先有分曉。

講到邪氣小朋友，不得不提來自日本的俊雄。早前先上畫的《貞子vs伽椰子》，都有出場，佢最可怕的地方係會驚驚青青咁匿在陰森處，你驚時佢又驚，唔知邊個嚇邊個。扮俊雄最容易，打大赤肋，補番個藍妝同超大黑眼圈就成事，不過今日天氣轉涼，想扮俊雄的朋友，小心冷親。

文：余建

《驅魔人》女童的外型已經駭人。（網上圖片）
《驅魔人》女童的外型已經駭人。（網上圖片）
1973年的作品，幕幕硬橋硬馬無特技，其實拍得出都幾恐怖。（網上圖片）
1973年的作品，幕幕硬橋硬馬無特技，其實拍得出都幾恐怖。（網上圖片）
小朋友嚟講，都算幾嚇人，而呢位童星亦只係拍過《凶兆》這部電影。（網上圖片）
小朋友嚟講，都算幾嚇人，而呢位童星亦只係拍過《凶兆》這部電影。（網上圖片）
睇親呢幕，都會7分驚，3分笑。（網上圖片）
睇親呢幕，都會7分驚，3分笑。（網上圖片）
「無面男童」，成功呃到唔少like。（Facebook圖片）
「無面男童」，成功呃到唔少like。（Facebook圖片）
不過就嚇到唔少同學仔。（Facebook圖片）
不過就嚇到唔少同學仔。（Facebook圖片）

〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。

專欄屬作者個人意見，不代表本網立場。

熱門新聞
編輯之選
  1. 更多