【now.com】好多事後孔明，如果邊個邊個啲票，分啲去咗邊個邊個度，咁就多個非建制入局，一加一減此消彼長。仲有諸如：「有個票王有乜用？」「歷史又要重複。」等等見慣見熟嘅評語。
其實鬼唔知咩？講緊當然就係朱凱迪，我自己一票都係俾咗佢，新西我有其他選擇，佢係其中之一，最後選擇投俾佢，係驚佢唔夠票，因為尋晚之前，全香港冇人知道佢會係票王，人人以為佢喺選到與選唔到之間，即是同何君堯爭選票嗰個，本來應該係佢，而唔係李卓人。
執筆之時，最後呢席其實未落實，更肉緊係新東長毛仲同方國珊咬緊，我自己係長毛fans，其實覺得好傷感，就算最後贏幾票，都開心唔落，最盡都係鬆一口氣。今次選舉，最大感覺係香港人好想團結做啲嘢，睇返個投票數字就知，或者睇吓半夜仲排隊投埋自己嗰票嘅人龍，就感覺到大家想用選票搵返少少自尊，少少希望。但意見分歧得好緊要，並無一個共同目標。淨係講超區，含淚定唔含淚，做人定做豬，都好多朋友因此反面。
仲未數完，最後個結果可能唔太差嘅，但越來越黑暗嘅制度，用同一個方法，以後又點頂得住？都未選，佢就可以先篩走唔順眼嘅候選人；種票種咗咁多年，都種成大樹，每屋每戶有幾多幽靈人口，邊個知；又睇返今年各年齡層選民新增選民數字，最多係61歲以上，超過20萬人，一車車輪椅阿公阿婆被老人院推去選，掌心雷寫定冧巴照填，被人見到可以大聲「報警拉我呀！」，都唔係新鮮事，係個數字加得太驚心動魄啫；敵對票站太多可以減緊個，理得你出面打蛇餅，投少一票就一票，又真係做得出。
仲有更離譜，身份證副本都可以投票，即是有人改改圖，就可以用你個身份去投票！如果你唔去票站，隨時被人投咗都唔知；仲有，身邊幾位（冇錯係幾位）朋友經歷過選舉資料被惡意更改嘅情況，個人資料無啦啦改到七彩，投票資格都冇埋；千辛萬苦攞到張票，崩角嘅又有，預先幫你剔定嘅又有，吸到個頭吸個政黨呢啲鬼鼠位搏你睇唔到嘅又有，仲要摺埋張票先見到個印透晒底，咁使乜摺埋啫，係人都睇到我投邊個啦。
人哋已經用咗十幾廿年集團式經營，招數日新月異，黑暗至此，我哋嗰少少光明，幾時先照到條路出嚟？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
