【now.com】童星出身嘅李泳漢,即是李泳豪個孖生大哥,李家鼎同施明個仔,阿嬌嘅宿世情人。今年佢好旺,年頭結婚,早兩個月做埋老竇,剛剛仲話選立法會,做九龍西獨立候選人。九龍西本身已經好有娛樂性,有鼠王、元秋,仲有林依麗,煩都煩死,突然再加多個李泳漢,隨時精彩過電影。
李泳漢在電視台多年,但代表作係在電視台以外,2002年佢突然宣稱自己修煉天眼通,稟神時見到同鍾欣潼(阿嬌)原來係前世夫妻,有一段宿世恩緣。於是成日都話要見阿嬌真人,再續前緣,甚至去阿嬌屋企樓下苦等,想送花上去結果被保安拒絕。因為太痴纏,阿嬌都怕咗佢,宿世情人喎,嚇死人咩?但李泳漢嘅行為已初見其政治手腕,懷住堅定信念,唔怕面懵,一味死纏爛打,佔領佢樓下。
隔咗差不多十年,2011年李泳漢想選區議會,佢在訪問提到,自己唔係咁「痴」,係記者設局屈佢,帶埋花車埋佢去阿嬌樓下,逼佢影相做新聞。咁就奇喇!咁多年來佢都冇提起過,一到選舉先講出嚟?同埋當時呢單新聞咁哄動,又持續咁耐,成日出親嚟就話想見阿嬌,仲話自己已經寫埋劇本,鬼故嚟嘅,叫阿嬌做女主角,佢自己做男主角,拍戲培養感情,唔通個劇本又係記者屈你寫?嗨,政治嘅嘢,先講先贏,要有根據咩?選完再追究啦。
今次再出選,第一件事就係呻窮,咁好正常,冇後台,獨立出嚟選係人都窮,但佢居然埋怨老竇李家鼎冇俾錢佢做選舉經費。係出色嘅,咁大個人,選舉靠老竇,選到之後就靠阿爺,政治正確!又爆料話李家鼎離婚後對屋企漠不關心,但係年頭你擺酒結婚,李家鼎仲一齊影相喎?真係複雜到極嘅家庭關係,我哋啲外人唔會明,如果今年唔係選舉年,都冇機會聽到李泳漢攞個老竇出嚟彈,你知啦,選舉年人人都好似鬼上身咁,建制派都可以狙擊梁振英,隻鬼選完就走㗎喇。
2011年佢曾高調出嚟選區議會,當時有黃毓民力撐,仲話要幫毓民滅鼠(鼠王芬)……條o靚劉偉榮,結果最後退選,原因係施明健康出問題,佢要全力照顧。今次再選,有人話係毓民派佢狙擊游蕙禎,如果係真,我諗游小姐應該好驚,個對手咁強,陣間話係你宿世仇人咁點甩身?李泳漢仲話當選會派飯俾露宿者,咁多人等食佢派嘅飯,選到有乜奇呀?
從李泳漢種種言行,佢根本天生就係骨格精奇,做政客嘅上佳人才。佢選舉拍檔符偉樂話,李泳漢在美國幫過共和黨助選,我真係戥共和黨唔抵,留唔住咁好嘅人才,一旦將來特朗普輸咗俾希拉莉,肯定就係因為冇咗李泳漢幫手,除非唔係。
文:魯連
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。
專欄屬作者個人意見,不代表本網立場