【now.com】一早起身上網睇報紙，見某報寫梁藝齡（以前叫梁佩玲，我小時候嘅女神）「50歲前無綫花旦梁珮玲苦撐助行架舉步維艱」，配張相好似老人院院友咁，當然嚇一跳，以為梁藝齡有絕症。之後幾條新聞標題係梁藝齡06年遇嚴重車禍呀，數返佢啲歷史咁，又嚇一嚇，心諗唔好有事呀，我早排再睇《孤男寡女》佢都仲咁靚，個天可唔可以憐香惜玉啲？
打開一睇，既開心又憤怒，開心係梁藝齡冇事，原來扭親腳啫！憤怒嘅係，報道內容寫得清清楚楚，記者已經做完電話訪問，知道只係叉錯腳扭親。即是已經搞清楚係一場誤會，佢唔係有絕症，唔係就嚟死，咁點解要用一個梁藝齡好唔掂嘅角度，「苦撐助行架」、「舉步維艱」呢啲誤導字眼切入呢？一個人扭親，就梗係慢慢行，痛嘛，好多更準確嘅形容詞可以用，「腳傷慢行」、「叉錯腳復健中」，想再聳動啲吸引啲，「扭傷跛行」又得唔得？
梁藝齡扭親，的確可以係一單新聞，當作關心一個退出藝人嘅近況，亦無不可。問題係呢單新聞分兩個階段，第一個階段係見到梁藝齡情況有異，要用助行架；第二個階段，係搞清楚情況，佢只係扭親，冇嚴重健康問題。但最後報紙選擇用一個未核實角度去報道，潛台詞係，「喂，大家記唔記得梁藝齡呀？以前無綫個花旦呢！佢都成50歲人喇，我哋見到佢行路要用助行架，舉步維艱，個樣好似就嚟死喇！仲唔快啲click入嚟睇吓？」到真係click入去睇，先話你知「哦，冇事，扭親啫，唔使擔心。」其實讀者本來唔擔心，係你令到我好擔心，而家調轉頭安慰返讀者，你冇嘢呀？
報道入面，見到有人鬧影相爆料個汪小姐，我又覺得唔可以怪佢，因為你唔知佢出發點係乜。始終好少人扭親腳要用到助行架咁大陣象，汪小姐可以係出於擔心，唔知梁藝齡發生咩事，又唔好意思行過去問，求助傳媒亦係正常途徑。唔影，唔問，點知發生咩事呢？只係查清楚後仲要咁寫，就係問題所在。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
