【now.com】憑著一句「去迪士尼做足準備」加上精靈Cute爆表情，令當年只有7歲的童星Jacky仔（王樹熹）迅間爆紅。時光飛逝，Jacky仔今年已經18歲，已經中學畢業並完成中學文憑試（DSE），為升讀大學做準備。Jacky仔日前接受now.com專訪，大談自己表演慾強，熱愛幕前演出，又話不介意露肉演出，挑戰做新一代「小鮮肉」！

學業要緊捨棄理想

已經有多年沒有活躍於螢幕前的Jacky仔，問到當初如何被發掘做童星，Jacky仔說自己當年只是「掹衫尾」入行，他說：「當時係哥哥（王秉熹）參加香港電台《點蟲蟲》節目應徵做主持仔，我陪哥哥一齊面試，但因為我當時太細膽而唔成功，後來要訪問我屋企嘅時候，可能因為當時導演睇中我夠得意，所以就搵埋我入港台一齊拍節目而入行，及後就漸漸有好多廣告，之後無綫就搵我拍劇集啦。」到升中學之後，Jacky仔功課忙過不斷，無暇顧及演藝事業發展，才慢慢淡出，Jacky仔話就算有演出都只是客串性質。

大學放榜日將至，Jacky仔對將來前途有什麼打算？他坦言以平常心面對，又大爆自己希望入讀浸會大學的傳理學系：「我自己心儀浸會大學傳理系，考試前其實都好大壓力嘅，要將幾年讀過嘅嘢一次過考晒出嚟都有啲辛苦，但考考吓就覺得信心越嚟越大，都有信心入到嘅！」縱然，Jacky仔又話自己仍然熱愛演出，曾經效力無綫多年的他更表示不抗拒新免費電視ViuTV找他合作，他說：「我都有留意到ViuTV節目，有多啲唔同選擇帶嚟更多競爭，或者會激發到大家嘅創意嘅！」

擇偶要揀啱傾幽默

一副乖仔斯文Look，加上Cute爆精靈表情，當年成功俘虜不少Fans，Jacky仔坦言現在已經長大，想挑戰做「反派」，他說：「𠵱家大個仔，可以試吓做大人啲嘅角色，唔再係小朋友咁，挑戰吓做啲奸角、反叛啲嘅角色，例如演吓醫生、律師之類。」會不會試下露肉騷肌演出？Jacky仔即刻面紅紅，但表示不會抗拒，他說：「要事先做多啲運動操Fit啦，只要睇得起我都okay嘅！」

訪問尾聲時，問到Jacky仔的感情狀況，他表示求學時期忙讀書，沒有時間拍拖，他說：「試過有女同學送禮物嘅，但我咁大個仔都冇拍過拖，自己都係鍾意幽默啲嘅女仔，同埋要大家傾得埋會比較好啲。」