【now.com】演藝界發起向前線消防員致敬活動，被人鬧得咁甘，但都只係得一個森美行出嚟幫藝人講說話，我覺得好神奇。其他藝人見到森美出來幫佢哋擋槍，冇感覺嘅咩？社會其他階層發生事，你冇感覺，等人帶頭就好啦幫手影張相，自己階層發生事，你都可以冇反應，都真係幾奇葩。
我其實認同森美講致敬同反應時間無關，場火燒完幾多日才致敬並非問題重點，真係唔可以咁樣計，演藝界人多事忙，籌備都要時間嘛！所以如果過多兩星期，甚至過多兩個月，演藝界有人出來向林榮基致敬、撐吓何韻詩、反三跑、反核、反圍標，都唔會遲。但有冇人會咁做呢？所以，真係唔係快慢嘅問題，而係有冇。
我永遠記得，號召藝人唱《問誰未發聲》，冇藝人肯唱，得黃秋生、張敬軒（軒仔）、方皓玟；《撐起雨傘》，得葉德嫻、黃耀明（明哥）、何韻詩、謝安琪、RubberBand、盧凱彤、周國賢，同一班獨立歌手與幕後人，咁大件事喎！試吓問番代唔代表到演藝界？肯定唔得，實同你死過；《十年》得金像獎最佳電影，直頭衝出嚟鬧，係咁鬧，不停鬧。所以有香港人覺得演藝界同社會脫節，並非無因。
演藝人又唔係完全冇為香港發聲，沙士有，1:99記憶猶新，反國教都有演藝人企出來，當中亦包括森美。所以我唔係想針對森美，佢已經係演藝人中比較敢言嘅一個，即使我唔同意佢呢番說話，至少佢會講出自己想法，嘗試用理據去維護演藝人尊嚴，而唔係單純埋怨「點解做好事都要俾人鬧？」
藝人要搵食，我當然明白，全香港人都要搵食，有邊個唔知搵食艱難？咁如果人人只顧自己飯碗，面對任何敏感事都唔出聲，淨係在一啲冇爭議事件上先敢走出嚟支持，係，咁睇好似係兩全其美，出到聲又傷害唔到自己，但人人都同一思維時，香港會變成點？
我相信每個藝人本身都有一定善心，就算今次被人鬧嗰班，裡面好多人都關心香港，好多說話想表達，但作為一個團體，所謂「演藝界」，就非常之縮頭烏龜。在呢個每日都發生不公義事件嘅香港，每人都要出分力，思考自己如何令香港走出呢個難關，咁作為一個團體，你又如何自處？當你嘅行業被人踐踏，上大陸搵錢失去言論自由時，香港好多人為你哋發聲，支持你哋重奪失去嘅自由。其實香港唔係得你哋做緊大陸人生意，好多人都在生活同公義之間抗爭緊，但你哋又點回應呢班人呢？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
