【now.com】上星期毛記電視的《萬千呃Like賀台慶》雖然觀眾評語好壞參半，但一眾「偽員」都叫做出盡力完成，可以叫飲得杯落，暫時好好休息一下。不過當中的東方昇同黃慘盈就看來有排挨，因為他們將會於nowTV挑戰足球節目主持！
昨日nowTV宣布取得今屆歐洲國家盃及美洲國家盃的播放權，會於38日內直播兩大賽事合共83場比賽。今屆賽事除了馬啟仁（Keyman）重出江湖，同一眾專業評述員方柏翹、陳葦如、曾偉忠等為大家評述精彩賽事外，亦有現役球員謝德謙及文彼得分析形勢。東方昇同黃慘盈就負責以創新角度睇波，希望令大家睇波都可以有全新體驗。
東方昇表示細細個就聽Keyman講波，所以昨日見面即刻搵對方合照。他又即場發表「愛國」言論，話歐國盃中自己最想睇嘅係中國，可惜冇得睇：「雖然可憑『一帶一路』去踢，但都係畀啲機會歐洲球隊喇！」而自言鍾意「張家輝」（美斯）的黃慘盈就被一眾網民提醒，叫佢記得做足功課，唔好步董嘉儀（Lulu）後塵成為明燈。
黃慘盈讚東方昇好重視場合，因為他罕有帶呔，又換埋頭巾。
東方昇捉埋Keyman合照。（Facebook圖片）
今次的全新配搭既專業、認真，又不失輕鬆。
