【now.com】ViuTV昨晚播出的綜藝節目《晚吹－一大一路》，第一集就請來劉鳴煒做嘉賓，由5位8至10歲小朋友諗問題和發問，他們的童言無忌令「Ming Wai哥哥」時而大笑，時而扁嘴。
想不到一班小朋友都有聽過劉鳴煒「睇少場戲、去少次日本」的買樓論，10歲的Alvin先問他可有後悔這番言論，劉鳴煒答：「我冇後悔喎，好多人誤解我呢番說話嘅根本意思。買樓就係要儲錢，儲錢就係要做少啲嘢。我唔能夠叫人食少啲飯著少啲衫，有啲嘢可以唔做嘅話，去少啲旅行咪可以慳到少少錢，如果真係想買樓就要做呢啲野，所以我冇後悔過。」
想不到Alvin反應極快，立即追問：「如果你咁講法，係咪即係你每次去日本都駛成百幾萬？」劉鳴煒料不到小朋友有此一著，扁住嘴答:「去日本玩唔使咁貴喎，亦冇可能係3,000蚊咁平。每個人，無論你係有錢定中產定基層都好，你嘅使費、慳儉、儲錢都係你自己負責，應使則使，應慳則慳。」他又讚Alvin牙尖嘴利和有思考分析過問題。
另一位8歲小朋友皓嵐就問：「啲人話你離地離到上太空，你有咩回應？」劉鳴煒反問：「你覺得我離唔離地？」皓嵐諗咗陣直言：「少少啦。」劉鳴煒皺一皺眉問：「點解你覺得我離地呢？」皓嵐就話：「啲人話你唔去旅行唔睇電影。」劉鳴煒就再次重申其買樓論：「買樓就要儲錢，儲錢就要駛少啲錢，我唔會叫人食少啲飯著少啲衫，唯有減啲可以犧牲嘅活動。」
10歲的Farhad就問：「乜嘢叫廢青？」身為青年事務委員會主席的劉鳴煒就話：「我覺得廢青係唔存在，冇青年人冇細路仔係廢，所以唔需要特登去答，因為冇人係廢，只係大人同老人家誤解年青人至會諗埋一邊。」
最後他又提醒小朋友們成年後要去投票：「你大個記住去投票喎，最有效去改變社會、改變你唔鍾意見到嘅嘢就係靠投票。」主持黃奕晨問Alvin：「你鍾意投乜嘢票啊？」Alvin又發功：「我想投票選特首，我都仲未夠大。」不過之後鏡頭未有影向劉鳴煒，亦未有聽到他回應。唉，小朋友，香港人都好想一人一票選特首㗎，可惜未見到希望呢！
