【now.com】大台新劇《EU超時任務》,少有的科幻警匪片,劇情講朱千正不斷重複同一日,去改變一件事的發展。據知「超時」即是超越時空咁解,又講得通喎,即是超時工作,係由返工時空,超越到OT時空嘛,明晒!暫時播了兩集,我坐定定睇完,暫時而言算幾好睇,頭兩集計絕對係近年難得睇得順眼的佳作,原因如下:
1. 冇蔡思貝
唔好意思,真係睇蔡思貝睇到想死,可能佢存在感太強,特色太突出,鬼殺咁嘈,總係覺得好似每晚都見到佢。一個唔喜歡的人日日夜夜出現在自己面前,其實係壓力,呢兩晚睇劇見佢唔到,簡直鬆一口氣,終於唔需要皺實個眉頭睇電視。
2. 抄得靚
劇集條大橋,絕對唔係原創,睇過湯告魯斯《異空戰士》,其實就已經知道《EU超時任務》大概會點發展,總之就係死完又去返同一朝起身,重複過同一日,不斷搵到新線索,不斷改變事情發展,最終逃離輪迴。咁死啦,抄仲讚佢?公道講句,《異空戰士》都唔係原創,係買日本《殺戮輪迴》版權,而《殺戮輪迴》都唔係原創,係參考1993年美國電影《Groundhog Day》。最緊要係,日抄夜抄,終於有套抄得好睇,比起其他抄完毀滅咗條橋的劇集,呢套算係咁啦。
3. Fusion得靚
除了抄,還有一種手法,叫fusion,將唔同電影或劇集元素「揉合」,例如《張保仔》就係將清朝海盜同加勒比海盜抄埋一碟。而今次《EU超時任務》頭兩集就係《異空戰士》X《PTU》X《竊聽風雲3》,既有熟悉的《PTU》開槍慢鏡特寫,又有《竊聽風雲3》圍村套丁,起碼都係港產片,夠晒親切。
4. 劇情暫時合理地緊湊
劇集緊湊唔難,但緊湊得來合理好難,好似《潮流教主》夠晒緊湊,一集發生幾十件事,全部都係陰謀,一氣呵成令人唔敢睇少眼,驚會錯過笑位,因為唔合理得太好笑喇!但《EU超時任務》劇情未見有特別犯駁位,已經好難得,做觀眾要求其實好卑微。不過都加返個「暫時」,皆因開個靚頭再衰收尾係通病,唔敢太大期望住。
5. 選角好
對主角我冇乜期望,總之唔係蔡思貝就得,但配角選羅樂林就係神來之筆,佢個角色係朱千雪爸爸,朱千雪每日重複就係要改變羅樂林被殺死的命運,即是要死好多好多次。在大台要搵個最死得的演員,非羅樂林莫屬,作為觀眾都非常肉緊,究竟有冇可能打破佢自己保持一日死5次的紀錄呢?呢個到最後可能會好睇過劇集本身。
話說回來,一開始都擔心,同一日不斷輪迴這種劇情,師奶未必受得到,但諗真,《愛‧回家》同一條誤會橋都輪迴了近千次(今晚是第988集),《EU超時任務》應該冇問題啦!
文:魯連
〈娛樂乜乜乜〉
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。逢星期一至五刊登。
專欄屬作者個人意見,不代表本網立場。