【now.com】當得知方力申與鄧麗欣分手這消息後,世界在這刻彷彿突然停頓了,那份震撼不單掀動整個MK,更一下子催毀了千萬人在這10年間,跟隨二人建立所得的愛情觀。他們明明是最要好的一對,就算遇上千尺風波都定必安然渡過,奈何就在10周年這個最值得慶祝的日子,殘忍地割下一記瘡疤,要以分手作紀念?
二人的愛始於葉念琛映畫,由初嚐《獨家試愛》,到認定關係發展成《我的最愛》,然後甜甜蜜蜜步入《紀念日》。戲中的一字一句和與別不同的思維方式,都成為一眾情海羔羊建立自我愛情觀的重要基石。現在基石崩壞,兩位精神代表人物的失據,令不少信徒頓失支柱,恐怕難再堅持下去。不過,我們是讀葉導演映畫大的,所以相信呢個世界所有嘢都係掩眼法,你睇到嘅嘢未必係真,真嘅呢又未必俾你睇到。既然如此,何不嘗試用「葉氏情理」,去分析這段大好姻緣,到底為甚麼潰敗,當中有可能幫到信眾們找到一些補遺。
在葉氏映画中,每有鬧分手情節,導火線定必是有第三者出現!因為十個男人九個滾,剩番一個仲諗緊。但就在宣佈分手同一日,Stephy於Instagram發表長文,明確表示「我們之間沒有第三者存在,沒有傷害對方的任何事情發生」。既然沒有第三者,問題好明顯來自男方,相信是經過十年相處後,Stephy終於看透小方原來都是個淨係知道佢條底褲擺邊,但永遠唔知佢條底線喺邊嘅臭男人!只不過在同一篇文,Stephy又澄清「小方是我認識過最好的男生,沒有福份跟他走到白頭,只怪緣份的安排。」
一齊都是天意弄人,始終Timing係好重要,大家出現嘅時間錯咗,係唔work,唔夾!不過Stephy不甘讓天意主導,也不甘自己徘徊在一個Tick同兩個Tick之間的忐忑,與其委屈地相信我呃你係因為我愛你,倒不如索性將自己變成一部電腦,鍾意就Keep,唔鍾意就Delete,多灑脫!只不過,浸淫葉氏映畫多年,你會發現戲中所有感情風波都是點綴,最終都定能捱過,然後復合。而且你愛他,就先傷害她,因為內疚永遠都係維繫愛情的最好方式。有理由相信小方這一着,就是維繫這段感情的Plan,今次個Plan亦終於有埋對方喇!
小風波的出現往往只是電影的一半,在這,好希望二人可以跟足劇情發展,下半場自有一場攤牌戲,以及聲嘶力竭質問對方的情節,然後在聲淚俱下間,腦海突然閃起十年來的甜蜜溫馨回憶,從而發現最愛的還是你,於是互相原諒,劃出一個美滿的結局。至於劇終前最後5分鐘的反高潮,雙方看似恩愛其實各有出軌之心……夠喇!即使這是電影最精彩的5分鐘,但作為信徒都要忍痛割愛!實在不忍Stephy和小方在現實中,也要承受這種你瞞我瞞他瞞佢暪的局中局再局多局的真結局。這種傷害不要Keep,要Delete,正如Stephy所講,請大家繼續相信愛情!
文:余建
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。
專欄屬作者個人意見,不代表本網立場。