【now.com】90年代盛極一時的青少年雜誌《YES!》，相信不少7、8、90後都有拜讀過。它橫跨幾個年代，每個年代都有各自追捧的原因。起初是追愛情信箱，解答情路難題。後來踏入四大天王年頭，買書為封面為靚相是必然，當然性事專欄又成為熱捧之一。到2000年打後，書中有一欄目曾經成為皇牌，期期一到手，都必然揭去先睹為快，呢個就係由筆名華少操刀的扮嘢專欄。
由於當年是卡拉OK火紅年代，行內還未歸邊，加州紅與幾間公司組成的大聯盟，鬥個你死我活，各自跟不同唱片公司連繫，搶獨家試唱權，形成兩大陣營不斷落電視廣告谷客，而書報及宣傳單張廣告亦不可少，而華少就在這堆其他人接過便丟的廢紙中，創造出自己的天地。他親自粉墨扮演廣告中的歌手，並由後來曾當填詞人的甄健強，負責將人家獨家試唱新歌的歌詞改頭換面。講到好複雜咁，以今日用語解說，即係惡搞！即係二次創作！於是大家就睇到由鄭秀文《如何掉眼淚》變成淪常慘案的《姨婆掉眼淚》、黎明的《全日愛》化成無精神Dance Song《全日瞓》，還有將謝霆鋒首《玉蝴蝶》淪為奇異邊爐主打《淥蝴蝶》，這完全是《歡樂今宵》的延續，他成為年輕一輩心目中的扮嘢王。
後來華少離開《Yes!》，大家已冇機會再見到華少，而雜誌亦在2014年結業。直至一個月前，他與幾位朋友將《姨婆掉眼淚》拍成MV放上YouTube，於是重燃大家對他的掛念。有傳媒更找他做專訪，才知他本人已婚，並轉行做項目統籌。訪問中，華少表現正正經經，冇姨婆的風趣，也冇Neon的金句，最難忘反而是講到自己冇打算生小朋友，因為他覺得眼前世界，不值得他帶一個新生命來經歷，甚至覺得全世界都不快樂，大家只是在苦中作樂。你以為這個答案是來自黃子華嗎？很有哲學味啊！
事實上，此言甚是，當你看看時下搞二次創作最成功毛記電視的作品，無錯！每首都笑到碌地，但作品背後事件的原貌是極其醜陋和悲哀，《亞視永恆》、《明張目膽》、《胸追人》、《我的回鄉證不是我的》等……對實況無能為力，就只有借首歌嘲笑下，取個快感，得個平衡，百分百苦中作樂。相比當日但求順口啱音，無聊地唱個故事脈絡便收貨的歡笑日子，純真的確早已被消逝。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
