【now.com】橫掃樂壇後，吳業坤（坤哥）突然成為人氣王，去到邊都好受歡迎。坤哥今日就造訪正為二月跨年演唱會綵排的溫拿，譚詠麟（校長）都要同坤哥影相，認真威水！影影下，校長發現坤哥同陳友好似，捉埋兩個鬼馬合照。睇真啲，二人同帶黑色粗框眼鏡，鼻又偏大，真係幾似孖生兄弟。
雖然，校長話坤哥係「稀客來探班」，但有心水清的網民就問坤哥係咪為當演唱會嘉賓而上去綵排，因為同樣來自《超級巨星》的何雁詩、林欣彤早前已確定會加入温拿的演出。如果屬實，好可能聽到温拿版《陽光點的歌》，坤哥應該會又感動到眼鏡起霧。
又真係幾似，唔通陳友都係偽毒？（微博截圖）
坤哥學陳友露少少額頭仲似！（微博圖片）
校長早前讚何雁詩、林欣彤及岑寧兒係有實力、個人風格的女唱將。（微博圖片）
閻亦格亦會登上溫拿舞台。校長果然畀好多機會新血！（微博圖片）
