【now.com】因為一句︰「不用分那麼細，因為我們都是中國人！」令羅志祥陷入一場公關災難，而且更引發一場恐慌性拋售，個個都被強烈的羊群效應影響，走去Unlike小豬個Facebook Page。昨日所見，實在是全民皆「股」，人人都走到電腦前不停按F5鍵看最新走勢。唯一不同是真正的恒指，愈跌只會令人愈傷心，但呢個「祥指」，就愈跌令人愈開心，無不歎為觀止。
其實件事本身好冇嘢，只係在內地電影《極限挑戰》一場宣傳活動上，主持人隨口問問小豬今次拍攝，要跟多位內地演員合作，有咩感受呀？照常理，你簡簡單單答大家合作愉快，冇隔膜，已經有80分。甚至你話關係好到似一家人咁，相親相愛都唔會有人嘈你，因為講到尾，呢個都係你自己的事，你有你的感受。但小豬好衰唔衰，好似突然被黃安上身咁，將所有問題都無限升級到國家級別，竟然無端端去慷全台灣人之慨答︰「不用分那麼細，因為我們都是中國人！」當刻贏得全場內地觀眾的掌聲，但你突然代2,300萬台灣人表態，呢次就真係「極限挑戰」真人版。
重溫片段，當時小豬對提問是秒回的，實在好英。有理由相信他是預計到這句話會取得剎那光輝，才衝口而出，所以那雷動的掌聲是應得的。事實上這份英氣好生活化，亦好熟口熟面，就似一班同事去食Lunch飲茶，埋單時你幫手碌卡俾住錢先，然後同事問︰「幾錢呀？夾番吖。」此刻你突然老細上身︰「唔好分嚟分去咁煩喇，我請！大家都係同事嘛。」可以幻想當下掌聲應該都有咁上下。
碌得卡，就預咗要還，不過小豬呢張卡冇60天免息還款期，而係要即簽即找，用Facebook專頁內粉絲的Like找，食水仲要好深。據知跌勢雖未去到秒秒鐘幾廿萬上落，但都有幾十至百幾個，而且大半日，便蒸發掉十幾萬。可惜Facebook冇熔斷機制，否則停一停市俾大家冷靜下聽佢解釋都好吖。不過小豬這番言論，在得失自己土生土長的台灣同胞時，肯定又為佢贏得不少中國同胞的愛戴。雖然冇人走去計算其中國微博的關注人數，但相信總會有所提升。所以小豬此舉以Like換關注，其實都好股民，不過佢唔炒股，專買人民幣，仲將大量台幣同港紙兌換成人仔實貨㖭，好穩陣。之但係，人民幣近期貶值喎，希望你有做定風險管理啦！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
