【now.com】TVB開新節目《網絡挑機》，請來多個香港知名YouTuber做嘉賓，名義上是讓他們鬧爆TVB，但播出前伍公子已講明節目唔對路，剪走佢話阿姐唱歌難聽片段，呼籲熄機罷睇。這個聲明引來編導岑應加入罵戰，好似好serious咁款。
岑應是什麼人？是《盛女愛作戰》、《求愛大作戰》、《沒女大翻身》一系列真人騷的始作俑者，但她拍的真人騷，除了名字有個真字之外，其他全部都唔似真，誇張成份極高，而網絡炒作是她的拿手好戲。
當佢一出現，好多事就要調轉來理解，伍公子叫你熄電視，其實即是叫你開電視，人有好奇心嘛，睇開伍公子的支持者，有幾個會睇電視？原本就是熄機狀態，被佢講一講，蟻咬咁，等我開電視睇吓有幾過份先。講到底，只不過是宣傳。
《網絡挑機》一開始聽起來似是網絡挑傳統媒體的機，又話請一班Youtuber上節目喪插TVB，但結果又是上到節目做陪襯，被動到暈，變成TVB挑網絡機，幾醜怪。諗真，睇了TVB幾十年，有邊次面子係唔重要的呢？就憑你幾個YouTuber？
現在拍了這個類真人騷節目，效果明顯就是令一班師奶睇到，後生仔講到紅極一時的YouTuber，又話會改變時代，原來只得咁多斤兩，我都係睇返阿叻算數。而這班師奶其實不知道香港仲有好多不同類型的YouTuber，節目中只是冰山一角。
對班YouTuber來講，都冇著數，如意算盤是上過電視後個profile更靚，更多廣告搵自己拍，價錢仲有得加?。問題是這班YouTuber，尤其是司徒夾帶，向來都擺明唔妥TVB，成日鬧，對電視工業痛心疾首，但轉個頭又上人節目喎，幾冇立場呀！YouTuber最大價值是什麼？就是立場囉！
其實都明白他們一心上電視想入屋的心態，確是錢途無限，但小心隨時入屋不成，反變無家可歸，被建立多年的支持者背棄，就蝕入肉了。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
