【now.com】日前電影公司發出《西遊記之三打白骨精》海報照，如果你一直冇留意有這套電影製作中，看見首批海報，第一個感覺可能會問係咪最新網絡遊戲宣傳呀？事關成張相根本就係一幅CG圖，半點人氣也嗅不到。到你知道係電影海報後，另一條問題即到，咁到底有邊個演？望落去都冇個識？其實你個個都識，孫悟空係郭富城，白骨精係鞏俐，沙僧係羅仲謙，豬八戒係小瀋陽，仲有馮紹峰演唐僧，如果最後兩位你唔識，證明你好少睇國產片或合拍片，未接軌呀你。
事實上，當你有睇過上集由甄子丹主演的《西遊記之大鬧天宮》，你會發覺這條軌真係唔易接，亦接唔住。明明有一大堆最好的演員，有最充足的製作資金，仲話有《阿凡達》班底製作特技，結果竟然得出一部長達兩小時，悶到發癲情節如膠似漆特技媲美電視劇《無雙譜》之流的「大片」！如果早前周柏豪被指拍了多部小本製作的是爛片，咁呢套就係爛片中的頂點，是得塊皮無餡你食的灌湯餃。而且該片更遺下一個史上最大謎團，到底聲稱係《阿凡達》班底的朋友，是屬於劇組的雜務部定還是茶水部？
好喇，當你盡情笑盡情不恥時，該片在香港都不過不失地收千萬，但未算勁，最勁係內地開畫第一日已經收1.25億人民幣，然後埋單計數更加係高達10億的人民幣！這是第一次切身感受到中港在文化上真係冇差異，有的是鴻溝，有些電影真係唔係怕俾香港人睇。既然開得第二集，在卡士冇得加碼之下，只好加多幾下PS，張海報整到有咁誇得咁誇。
更誇係，連同3年前星爺套《西遊︰降魔篇》又收12.5億，《西遊記》這個題材已經連冧兩鋪莊，於是在內地掀起一股西遊熱，據報道指，將來一、兩年間，將會有6部關於《西遊記》的電影上畫，其餘的包括冇咗星爺，改由徐克執導的《西遊︰降魔篇2》，到底孫悟空會變成狄仁杰查案定係重拾《蜀山》的奇幻潮？原本執導《西遊︰降魔篇》的郭子健就另起爐灶，搵彭宇晏余文樂拍《悟空傳》，似乎想為孫悟空塑造一個暗黑英雄版本。繼續同星爺有關嘅有90年代經典《月光寶盒》導演劉鎮偉，再次化身菩提老祖，重操故業拍多套《大話西遊III》（註︰《大話西遊》是當年《月光寶盒》在內地的戲名）。連同武俠片導演程小東籌備的《西遊記之盤絲洞》，以及內地導演霍建起拍的《大唐玄奘》，無多無少，6套排住隊鬥快散貨，保證呢兩年大家都有排「西」。
香港人好，中國人好，都鍾意一窩蜂，而一窩蜂後往往都係爛尾收場，正如當年的千軍萬馬的大場面電影，又係拍到爛拍到無人睇先肯收科，所以唔難估計呢股西遊熱應該好快又會被玩殘，到時睇下係觀眾西口先，定係老闆西面先。
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
