【now.com】看台灣的最新跨國賣淫案,發展到出現字母小姐的階段,突然發現原來已經25年。1990年錢志明的騙色案件牽涉ABCDEX小姐,轟動程度是來到今天仍然會在討論區看到有人在估字母小姐的身份!最新的台灣版變成ZSLW小姐,相信熱潮都會維持一段長時間,一來是牽涉娛樂圈的風化案,二來是因為有得競猜,人人都估,自己唔估根本冇話題。
不要小看競猜,八卦雜誌裡面,最受歡迎的,一定是那些八姨丈八舅公欄目,化個似是而非的名,寫人私隱,甚至憑空作故仔,其實你分不出真假,但一定睇得enjoy,因為有得估,跟同事討論,無厘頭地拗到面紅耳熱,咁就消磨了一個下午。
嫌化名唔夠勁?得,整埋個黑色剪影俾你,基本面型、髮型都睇得到,將猜謎門檻降低,吸引更多其實唔算超八卦的人一齊估,你唔係冇估過下嘩?
在這麼多個猜謎遊戲中,字母小姐算是最難估又最易估的一個,點解?最難估是因為除了得個字母之外,最多就是幾句形容詞,正所謂人有相似,遭遇也有相似,好容易估錯隔離。加上兩次字母小姐事件,涉案人士都不是大明星,範圍大,就更難估了。
而最易估是因為,你未開始估,傳媒已出茅招搵定幾個女仔問回應。這個手法,25年未變過,全香港或全台灣幾百個女星,一開始只集中問5、6個,那其實已經是一種不負責任的表態了,不是說一定是那幾個女仔,而是這樣問一問,任誰都水洗唔清。又咬佢唔入,嗱,我冇爆係邊個邊個呀,你自己聰明估到咋!
當然今次的字母小姐性質上跟90年的不同,ABCDEX是騙色案的受害人,而ZSLW則是跨境賣淫的嫌疑人物,可以是無辜,亦可能有罪,所以你會見到台灣媒體大膽得多,起碼用的字母夠膽令人產生「姓」的聯想,一看就知道字母跟姓名有關。你又試下結果出爐,然後發現那幾個字母原來跟涉案人姓名無關吖,台灣人上街燒報紙都似。
文:魯連
〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。