【now.com】方東昇主持的《世界零距離II》，由第一集開始已經一笑驚人，每句旁白都度到盡，無一粒字係多餘。大家愛笑他的金句，其實更愛那種反差，一個正經八百的新聞報道員，平時見佢講親唔係死人就冧樓，斷想不到他可以妙語連珠到如此地步，比當年的伍晃榮有過之而無不及。波係圓嘅，但亦比不上昇爺說話咁玄。嚴格來說，《世界零距離II》不算是旅遊節目，是資訊節目，專門介紹世界最山旮旯（呢個正字都係昇爺教）的地方，福克蘭群島、法屬圭亞那、列支敦士登、委內瑞拉等地。任你排下一次最想去旅行的地方，廿個Quota都未必排到上榜，但見到昇爺短短半小時的旅程，就叫你看得心曠神怡。
一直都鍾意睇遊旅節目，細個連只得風景空鏡，然後加上旁白的《大江南北》、《寰宇風情》同《日本風情畫》都半知半解地看得好滋味。後來出現過一批以年輕偶像掛帥，主持的旅遊節目《點解____咁好玩》，去邊度就填邊度落去，開始了旅遊節目要玩得夠開心的定調。但數印象最深，反而是由區倩怡與蓋世寶主持的《反斗俱樂部》。如果今時今日六位主持《學是學非》的是非精叫嘈，那麼當年這對反斗雙妹嘜的音頻之高可謂以二打六都冇輸半個馬鼻。
以上節目多由旅行社贊助，製作講求靚人靚景，不過看得多，漸漸覺得太多包裝太乏味，而且在未有大陸自由行前，港人已愛自由行，所以第一身體驗的旅遊節目亦應運而生。杜如風跟洪永城就是這一類，當年他／她們分別在收費電視，主持個人式遊旅節目，前者強攻日本，拎住部機自拍自言自語喪玩喪食；另一位則以體驗當地生活為賣點，剪個髮踢場波，你去旅行唔會做的他統統做晒，所以今趟以張保仔身分入到長洲冇去剪髮，總係覺得差啲啲。
今天的昇爺，食字多過食螺絲，引用歌詞的準繩斷估是標準K迷，熟悉金句的程度更有可能是高登之友，絕對有本錢成為新一代旅遊主播。至於返回崗位報番新聞？恐怕大家以為睇緊六點半左右新聞報道喎！
文：余建
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
