【now.com】昨日有3對娛圈新人齊齊搞婚禮，但風頭可以話畀黃曉明同Angelababy的童話式婚禮搶晒鏡。不過呢，阿Bob林盛斌昨夜在錢國偉和陳宛蔚婚宴上，飲大兩杯後發生的一連串「搞氣氛」事件，成功為「錢陳婚禮」製造話題。
據稱飲到醉晒的阿Bob，在「古惑仔」上台唱《友情歲月》助慶時，突然衝上台搶咪，此舉令台上的陳小春不滿，雖然阿Bob已即時被人拉下台，但火爆的小春爆粗之餘，更想落台追打阿Bob，眾人即時拉住小春。
之後阿Bob被拉走離場，誰知道他自行又折返會場，表示一定要向小春道歉。眾人怕兩人會有進一步的衝突，分成兩邊拉住雙方，但阿Bob堅持要道歉，在拉拉扯扯期間，「陳浩南」鄭伊健都忍不住出面制止。
最後凌晨1點，阿Bob在梁烈唯（唯唯）陪同下離開會場，阿Bob一臉醉貓樣表示：「其實我唔係飲好多之嘛。」問他最終有否向小春道歉？他說：「兄弟嚟嘅，冇事，夠啦！」在記者再三追問，阿Bob突然捉住唯唯咀嘴，更連咀三次，大叫與唯唯最friend，邊舉V邊上車，認真夠盡興！
阿Bob昨夜在晚宴上上載過一張醉貓自拍相上網，並寫道：「大鑊，已經醉咗........」（facebook圖片）
唯唯昨夜都有上載和Bob的合照，阿Bob明顯high到爆。（微博圖片）
