【now.com】前幾日先講緊拖糧，尋日就突然話有新買家入主亞視，講到注資100億資金，仲話會重新申請免費電視牌照。呢單已經不能算是新聞，而是一個超大謎團，究竟是什麼原因驅使一個財團，在亞視失去免費電視牌照之後，才注資100億呢？
既然是國企資本，自然令人聯想到政治任務，例如引入國語廣播呀，進一步收窄廣東話生存空間呀，國民教育呀，等等。問題是，如果說這些是國家一定要完成的政治任務的話，其實亞視之前一直都做緊喎！王征領導的亞視就是紅色背景，紅到可以收到獨家（但錯誤的）江澤民死訊，其他節目如《ATV焦點》、《微播天下》等本來就有紅色功能，何苦要這麼麻煩，先不續牌，再賣給另一個紅色資本，又能夠做什麼？
不難想到，原來做紅色電視台，都要自負盈虧的，蝕太多錢，阿爺都不會照你。既是自負盈虧，問題就來了，若執意要做紅色電視台，要如何令「一點」收視變成兩點、三點，甚至更多，多到有盈利？多少也好，沒有盈，就是虧，一門生意，就當你真的有100億，可以虧幾耐？另一個問題，0511現在的總市值約115億，若買家有100億，而佢有政治任務在身，為何要打ATV主意，而不是TVB？
所以我好肯定，今次擺明不是政治任務的問題，而是講緊又有一個大陸財團接手，填這個永遠不會滿的黑洞。要廣播，就一定每個月都有固定支出，但要賺你又賺唔到，這個本來就不應存在的黑洞，居然一次又一次有人出手拯救。只令我想到，這個黑洞識得食錢，會唔會係一種得佢先睇到的價值呢？
當然以我的智慧永遠不會思考得到，而其實新老闆入主，對亞視員工是有意義的，起碼可以繼續搵食。但製作費不可能有大幅增加，因為實驗早已證明慣性收視跟你做何種規格的節目無關，即是說，新人事也不會有新作風，只能重複之前的做法，用最低成本做最低限度（即是足夠廣播牌照需要）的節目，慢慢地、自以為有尊嚴地繼續燒銀紙，若真有100億，大概可以同太陽一樣，燒到永恆吧。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
